Ministri i Financave në Kosovë, Besnik Bislimi ka propozuar planin ekonomik për t’u përballur me krizën nga koronavirusi në vend.
Masat e marra për të frenuar koronavirusin në vend kanë penguar prodhimin dhe ka rënie të aktivitetit ekonomik në tri kategori, tek qytetarët, komuniteti i biznesit dhe buxheti i shtetit, bëri me dije ministri.
Ai theksoi se synimi nuk është kompensimi i të gjitha dëmeve, por minimizimi i tyre.
Kështu qeveria do t’i kompensojë kompanitë për pagat, në masën e pagës minimale prej 170 eurosh.
“Mbulimin e shpenzimeve për paga për ata që janë afektuar në masën e pagës minimale prej 170 euro për dy muaj në vijim, maksimumi i mjeteve të alokuara në këtë masë janë 41 milionë euro”.
Gjithashtu ai theksoi subvencionimin e qirasë deri në 50% për ndërmarrjet e vogla dhe të mesme për dy muajt e ardhshëm.
“Për punëtorët e ndikuar nga pika 1, që marrin atë pagën shtesë nga qeveria prej 170, qeveria merr përsipër edhe mbulimin e kontributeve pensionale për dy muajt e ardhshëm”, ka thënë ai para medieve.
Në këtë plan që do të propozohet në mbledhjen e qeverisë, hyjnë gjithsej 13 masa ekonomike, mes të cilave edhe shpërblimi me nga 300 euro për dy muajt e ardhshëm të mjekëve e punëtorëve tjerë shëndetësorë, policëve dhe zjarrfikësve për kontributin në këtë kohë të pandemisë.
“Stafi mjekësor, policëve dhe zjarrëfikësve. Qeveria e Republikës së Kosovës në bazë të këtij propozimi për këto kategori të nënpunësve publikë do të ndante një shpërblim shtesë në masën fikse prej 300 eurove për secilin në dy muajt në vijim. Pa marrë parasysh nivelin e pagës, gradës secili përfiton prej 300 euro për dy muaj në vijim”, tha Bislimi në një konferencë për media ku shpalosi në tërësi propozimin e tij.
Ndërkohë, në Shqipëri është prezantuar gjithashtu plani i qeverisë për t’u ardhur në ndihmë disa kategorive me nevoja më të mëdha në vend pas krizës së koronavorusit.
Katëgoritë janë bizneset e vogla që janë mbyllur për shkak të masave kufizuese, personat me ndihmë ekonomike dhe të papunët që marrin pagesë papunësie.
“Shuma për ata që kanë mbyllur biznesin do bëhet 57 miliardë lekë të rinj, dyfish i shumës së deklaruar si pagesa në kohë paqe (710 mln lekë). Këta janë plot 60 440 persona që s’do t’i lëmë vetëm“, u shpreh kreu i qeverisë Edi Rama.
Po kështu shuma që shteti në “kohë paqeje” paguan për familjet në kategorinë e ndihmës ekonomike (340 milionë lekë të reja në muaj), do të dyfishohet për 70 mijë familjet në nevojë të regjistruara.
Rama tha gjithashtu se do të dyfishohet pagesa për të papunët, por nuk foli me shifra konkrete për këtë kategori duke e lënë disi të paqartë.
/Iconstyle.al
