Detaje të reja janë zbardhur sot për dy personat e infektuar në qytetin e Tropojës.
Dy personat e infektuar janë burrë e grua rreth të 40-tave dhe burime për “Faxweb.al” bëjnë me dijë se janë infektuar nga motra e gruas nga Italia, e cila fatmirësisht e ka kaluar sëmundjen pa shenja dhe në gjendje të mirë shëndetësore.
Burri është punonjës i shërbimit informativ në Tropojë, ndërsa gruaja është mësuese. Prej 5 ditësh ata kanë pasur shenja të sëmundjes dhe kanë shkuar fillimisht në Urgjencën e Spitalit në Tropojë, ku më pas janë adresuar për të bërë edhe analizat.
Por më e frikshme është se gjatë gjithë këtyre ditëve çifti ka pasur lëvizje në qytet, dhe nuk ka qenë i vetëizoluar çka shton frikën se ata mund ta kenë transmetuar virusin dhe te persona të tjerë.
“Po ashtu analizave dhe testimeve pritet t’u nënshtrohen edhe mjekët, të cilët kanë pasur kontakt me çiftin e bashkëshortëve, njëri prej të cilëve po mbahet në shtëpi, dhe tjetri është dërguar në spitalin Infektiv në Tiranë”, raporton “Faxweb.al”.
