Ministria e Shëndetësisë ka përditësuar sot të dhënat mbi situatën e koronavirusit në Shqipëri, duke bërë me dije se ka arritur në 146 numri i të infektuarve, me 23 raste të reja në 24 orë.
Zëvendësministrja Mira Rakacolli theksoi se janë 72 persona të shtruar aktualisht në spitalin e Infektivit, 4 prej të cilëve ndodhen në repartin e terapisë intensive dhe 3 të intubuar në gjendje të rëndë.
Por Rakacolli dha dhe një lajm të mirë duke shtuar se 17 qytetarë janë shëruar nga koronavirusi edhe pse aktualisht janë të vetëizoluar do të vijojnë të qëndrojnë në karantinë për 14 ditë.
“Në 24 orët e fundit janë konfirmuar 23 raste të reja me COVID-19 dhe janë kryer 111 testime. Deri në këto momente testuar 1041 janë raste të dyshuara dhe prej tyre janë të konfirmuar pozitivë me COVID-19, 146 qytetarë. Harta e të prekurve nga COVID-19 është shtrirë tashmë edhe në Krujë dhe zgjerohet në Tiranë, Korçë, Fier, Durrës, Lezhë, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit”.
Shpërndarja gjeografike e rasteve pozitive, është si më poshtë:
- Tiranë 83 qytetarë
- Durrës 9 qytetarë
- Lushnje 4 qytetarë
- Elbasan 3 qytetarë
- Fier 14 qytetarë
- Rrogozhinë 2 qytetarë
- Kavajë 4 qytetarë
- Korcë 11 qytetarë
- Vlorë 5 qytetarë
- Shkodër 3 qytetarë
- Lezhe 4 qytetarë
- Berat 1 qytetarë
- Has 2 qytetarë
- Krujë 1 qytetar
/Iconstyle.al
