Teksa epidemia e koronavirusit ka përfshirë vendin duke çuar në nevojën e një izolimi të përgjithshëm, sytë e të gjithëve këto ditë kanë qenë tek lajmet. Dikush në pritje për të mësuar sa ka shkuar numri i të prekurve, dikush për të mësuar masat e reja kufizuese e dikush për të mësuar mbi lehtësirat fiskale që qeveria po ofron për të përballuar një krizë ekonomike që pritet të godasë vendin e botën mbarë.
Mirëpo mes gjithë morisë së njerëzve, një person në veçanti duket se sot po rivlerëson më së shumti punën e medias në Shqipëri: kryeministri Rama.
Ndonëse prej kohësh kryeministri e ka pagëzuar median në vend me emrin “kazan” e deri në dy javë më parë i bënte thirrje njerëzve në mesazhet zanore që të ruheshin nga mediat, gjërat në shumë pak ditë kanë ndryshuar dhe të gjithë do të ishim duke qeshur me ironinë e fatit sot, sikur situata të mos ishte kaq kritike.
Që prej përshkallëzimit të epidemisë në vend, kryeministrit i është dashur që t’i drejtohet për ndihmë pikërisht “kazaneve” që tashmë u kërkon të shpërndajnë sa më shumë të jetë e mundur mesazhet për izolimin, ruajtjen e higjjienës etj. Dhe bravo i qoftë, sepse në situata të tilla, krenaria e kokëfortësia qartazi nuk pijnë ujë dhe nga media gjithashtu është bërë maksimumi për t’i dhënë jehonë mesazheve të tij.
Krahas industrisë ushqimore, farmaceutikës dhe bankave, mediat janë ndër të vetmet biznese që vijojnë non stop punën në këto ditë izolimi kombëtar, me një ritëm edhe më të vrullshëm se më parë.
Etja e publikut për të pasur sa më shumë informacion në një kohë sa më të shkurtër ka ngritur në këmbë redaksitë që në shtëpi, zyra apo edhe në terren duke rrezikuar shëndetin, punojnë shumë shpesh dhe jashtë orareve për të transmetuar në kohë çdo informacion me vlerë, që ka luajtur një rol të vendimtar në zbatimin e planit të qeverisë për parandalimin e përhapjes së COVID-19.
Mirëpo teksa audienca është shtuar e puna po ashtu, për mediat në vend të ardhurat dita-ditës po pakësohen.
Në një kohë kur vendi është gati të përballet me një krizë shëndetësore e ekonomike, bizneset po mundohen të mbrohen në çdo formë të jetë e mundur dhe një ndër masat e para të marra, është shkurtimi i buxheteve për reklamat, të cilat janë të ardhurat kryesore për mediat.
Në javën e dytë të izolimit, në korridoret e mediave në mbarë vendin nisën të qarkullonin zërat për shkurtime vendesh pune, leje të detyruara e reduktime pagash që dalëngadalë po vihen në jetë. Por ndërkohë që puna e gazetarëve e stafeve mediatike është thelbësore në zbatimin e strategjive të qeverisë për frenimin e epidemisë, përse mediat vijojnë të injorohen në aspektin ekonomik nga qeveria?
Prej 10 ditësh në vend ka ndalur botimi i gazetave e shumë televizione kanë ndalur transmetimet e programeve të ndryshme duke u munduar të mbushin kohën televizive me ç’të mundin, çka po i çon ato drejt ezaurimit financiar dhe është thjesht çështje kohe që këto masa të prekin dhe redaksitë e lajmeve të cilat që tani, punojnë me stafe të reduktuara.
E megjithatë, ndonëse puna e tyre është një domosdoshmëri që kurrësesi nuk mund të zëvendësohet me disa video live në Facebook, qeveria ende nuk ka thënë asnjë fjalë për situatën financiare me të cilën po përballen mediat shqiptare.
Në masat ekonomike të prezantuara nga Rama pak ditë më parë që vijojnë të shtjellohen dita ditës nga gazetarët për t’u përcjellë qartë dhe kuptueshëm tek publiku, deri më tani nuk është thënë asgjë për punën e medias që ashtu si mjekët, janë në krye të detyrës për të informuar, në mënyrë që të shpëtohen jetë. Asnjë mbështetje, asnjë lehtësim, asnjë premtim!
Por përpiquni për një çastë të imagjinoni sikur të gjitha mediat në vend një prej këtyre ditëve të ndërprisnin sinjalin e të linin vendin në një terr informativ. Nuk është skenari që do të donim të shihnim, apo jo?!
