Mbrëmjen e kaluar në vendin tonë u shënua viktima e tretë nga koronavirusi.
Një 71-vjeçar, i cili vuante nga kanceri në mushkëri, nuk mundi të mposhtë virusin vdekjeprurës.
I moshuari ishte me origjinë nga Kuçova dhe në spitalin Infektiv shfaqi një komplikacion të menjëhershëm kardiak arterial.
Në Shqipëri janë konfirmuar nga ministria 89 raste pozitive me koronavirus dhe 3 viktima. Një 66-vjeçar nga Lushnja, i cili prej ditësh ishte i shtruar në Spitalin Infektiv u nda nga jeta dhe një e moshuar 73-vjeçare nga Durrësi, e cila vuante nga një sërë sëmundjesh gjithashtu ka ndërruar jetë.
Ndërkohë, gjatë kësaj jave orari i lëvizjeve është 05:00-13:00. Gjatë këtyre orëve mund të bëni pazaret e nevojshme, por pa i thyer rregullat.
Kosovë
Në Kosovë, numri total i të prekurve ka shkuar në 33 dhe një person ndërroi jetë djtën e djeshme.
Viktima ishte 82 vjeç, i lindur në Dumnicë të Podujevës dhe vuante nga sëmundje kronike të zemrës dhe mushkërive.
Shteti ka marrë masa të rrepta për parandalimin e përhapjes së koronavirusit duke kufizuar daljet dhe janë mbyllur parqet.
Maqedonia e Veriut
Ndërsa numri i të infektuarve në Maqedoninë e Veriut ka shkuar në 114, frika nga pandemia dhe rastet e thyerjes së rregullave nga ana e qytetarëve ka shtyrë qeverinë të vendosë gjoba të ‘majme’ si dhe të kufizojë oraret e lëvizjes së njerëzve për të sensibilizuar qytetarët e saj.
Ditën e djeshme, në Maqedoninë e Veriut u shënua edhe viktima e patë
Viktima është 57-vjeçare nga qyteti i Kumanovës, e cila pasi ndërroi jetë u diagnostikua me Covid-19. Ajo sipas ministrit, dy herë më parë kishte rezultuar negative në analizat e bëra. Viktima javën e fundit është trajtuar në izolim në spitalin e Kumanovës.
Mali i Zi
Një person i infektuar me virusin Covid-19 ka ndërruar jetë në Malin e Zi.
Ky është rasti i parë në shtetin me pak më shumë se 600 mijë banorë që numëron 21 të infektuar me koronavirus.
Viktima ishte 61-vjeç dhe ndërroi jetë mbrëmjen e kaluar në Qendrën Klinike të vendit.
Itali
Në 24 orët e fundit mësohet se në Itali kanë ndërruar jetë 651 persona dhe janë konfirmuar 3957 raste të reja të infektuar.
Kështu, numri i viktimave nga Covid-19 në Itali ka shkuar deri tani në 5476.
Ky është një bilanc tragjik, megjithatë krahasuar me dy ditë më parë numri i viktimave ka ardhur në ulje.
Borrelli tha se ndonëse ka zbritur numri i të vdekurve, është rritur ai i të prekurve duke shkuar në 46, 638 persona.
Gjermani
Gjermania ka marrë masa të rrepta për të parandaluar përhapjen e COVID-19 pasi numri i të infektuarve është rritur ndjeshëm.
Aktualisht në Gjermani janë komfirmuar 24, 806 persona të infektuar dhe 93 persona kanë ndërruar jetë. Ditën e djeshme kancelarja, Angela Merkel deklaroi se është vetë-izoluar pasi pati kontakt me një mjek të onfektuar.
SHBA
Në SHBA numri i të infektuarve nga koronavirusi ka shkuar në 32, 953 dhe kanë ndërruar jetë 454 persona. Ditën e djeshme presidenti Donald Trump bëri me dije se ka marrë masa të reja për të lehtësuar bizneset dhe familjet.
Ai tha se data e taksave është shtyrë nga 15 prilli në 15 qershor.
Kina
Në Kinë situata është përmirësuar ndjeshëm dhe në 24 orët e fundit kanë ndërruar jetë 9 persona duke e çuar numrin në 3270. Ndërsa raste të reja të infektuar janë 39 dhe në total 81, 093.
