Ditën e djeshme kryeministri Edi Rama bëri me dije oraret e reja të qarkullimit.
Në njoftimin zyrtar u tha se prej orës 13:00 të datës 21.03.2020 deri në orën 05:00 të datës 23.03.2020 ndalohet qarkullimi për të gjithë qytetarët dhe automjetet.
Rregulli i ri ka sjellë një dyndje masive të njerëzve në markete dhe në furrat e bukës.
Kjo gjë duket se i ka indinjuar qytetarët në Korçë dhe mesditën e sotme është regjistruar një sherr masiv.
Ngjarja ka ndodhur përpara një furre buke, ku ishin grumbulluar një numër i madh qytetarësh.
Mësohet se shkak për konfliktin janë bërë radhët e gjata.
“BallkanWeb” ka publikuar pamje nga vendi i ngjarjes dhe shihet se qytetarët nuk respektojnë rregullat për radhën, largësinë 1 metër dhe nuk kanë as masa mbrojtëse.
Kryeministri i vendit tha se ata që nuk do të respektojnë masat, përveç gjobës, në raste grumbullimesh masive, policia është e autorizuar që të përdorë edhe forcë.
Bilanci i COVID-19 në vendin tonë është 76 të prekur, nga të cilët 2 të vdekur dhe dy të shëruar.
Te Infektivi janë shtruar 37 pacientë, 4 prej të cilëve mbahen në terapi intensive.
