Ministrja e Shëndetësisë, Ogerta Manastirliu ka bërë me dije sot po punohet për shtimin e numrit të respiratorëve në strukturën e Reaminacionit.
Edhe pse nuk foli me shifra sa do të shtohen apo sa janë aktualisht, ministrja theksoi se është dyfishuar kapaciteti i respiratorëve që ndodhen në Spitalin Infektiv në QSUT.
Kjo deklaratë vjen pak pasi “iconstyle.al”, theksoi mungesën e transparencës mbi numrin e këtyre pajisjeve që mund të vulosin fatin e pacientëve të shumtë me Koronavirus.
Sipas dokumentave të siguruara nga “Dosja.al”, fondi limit për blerjen e respiratorëve është 129, 727.371 lekë. Pas disa hulumtimeve të kryera online nga “iconstyle.al”, kostoja e një respiratori varion nga 25.000 në 50.000 dollarë, me një çmim mesatar prej 37.500 dollarësh.
Me një përllogaritje të thjeshtë na rezulton se me shumën e përcaktuar, Ministria e Shëndetësisë mund të marrë nëpërmjet këtij tenderi përfarërsisht 30 respiratorë, një shifër tërësisht qesharake!
Ministrja shtoi gjithashtu se nga e premtja, shërbimi i Kirurgjisë së Urgjencës do të tranferohet në Spitalin e Traumës.
Ky vendim merret për të krijuar zona sanitare të sigurta për pacientët që trajtohen në spitale.
Ministrja dha gjithashtu një lajm të mirë për personalein e spitalit të Fierit, të cilët kanë rezultuar negativë për COVID-19.
“Në zbatim të planit të veprimit të miratuar nga Komitetit Teknik dhe Task Forca, sot ne kemi vendosur që për të lehtësuar kapacitetet e QSUT, për të krijuar zonat sanitare të sigurta për pacientët të cilët trajtohen në spitale jo për COVID-19, që shërbimi i Kirurgjisë së Urgjencës dhe ndërhyrjeve Kirurgjikale për patologjitë malinje, përkatësisht Klinikat 1, 2 dhe Urologjisë në QSUT, të transferohen në Spitalin Universitar të Traumës, duke filluar nga dita e premte, datë 20 Mars”, bëri të ditur ministrja Manastirliu.
“Lajmi i mirë është se 27 mjekë dhe infermierë të spitalit të Fierit kanë rezultuar negativë për COVID-19 dhe këtu kam një falenderim të veçantë për çdo mjek dhe infermier që me përgjegjësi e profesionalizëm po ndjek rregullat e mbrojtjes personale. Ne po bëjmë të gjitha përpjekjet e mundshme për të siguruar stokun e nevojshëm të materialeve mbrojtëse për të gjithë personelin shëndetësor dhe brenda javës presim dërgesën e rradhës, ndërkohë që theksoj se personeli është është i pajisur me mjetet mbrojtëse personale në shërbimin shëndetësor. Paralelisht po punojmë për shtimin e numrit të respiratorëve në strukturën e Reaminacionit. Ndërkohë, është dyfishuar kapaciteti i respiratorëve në Spitalin Infektiv në QSUT. Për të moshuarit mbi 65 vjeç, që nuk kanë familjarë apo fëmijët afër, do t’u mundësohet sipas një plani me mjekun e familjes dhe farmacistin ku shërbehet, ofrimi i medikamenteve në banesë”, bëri të ditur Manastirliu.
Në fund të komunikimit Manastirliu ka bërë thirrje për qytetarët që të zbatojnë rregullat e përcaktuara duke theksuar se distancimi social është strategjia më e mirë për të fituar këtë luftë.
“Distancimi social dhe izolimi që po përjetojmë në këto ditë ka rezultuar strategjia më e mirë në vende ku është zbatuar, për të lehtësuar punën që po bëjnë stafet tona në sistemin shëndetësor. Ne e kemi ndërmarrë në kohë këtë masë që edhe vende të tjera janë duke e bërë. Jemi duke u përpjekur maksimalisht që me kapacitetet që kemi të bëjmë më të mirën”, tha Manastirliu.
/Iconstyle.al
