Një javë pas bërjes publike të dy rasteve të para me koronavirus në Shqipëri, ende nuk ka asnjë plan të mirëfilltë për të parandaluar një kolaps të mundshëm të ekonomisë, si pasojë e mbylljes së menjëhershme të bizneseve në vend pas urdhërit të kryeministrit.
Pas impaktit të jashtëzakonshëm që pati tërmeti i 26 nëntorit në ekonominë e vendit, një tjetër goditje si ky virus që po mbërthen botën mbarë mund të ketë pasoja fatale për ekonominë e vendit dhe një gjë të tillë e konfirmon dhe gjermania “Deutche Welle”.
“Vetë-izolimi dhe ndërprerja me ligj e aktivitetit të përditshëm të sipërmarrjes private rrezikon fillimin e krizës ekonomike në Shqipëri.”-shkruan media e famshme gjermane referuar masave të marra për të parandaluar përhapjen e mëtejshme të virusit në vendin tonë.
Por ndonëse këto masa ndaluese janë marrë në mënyrë të menjëhershme, çka është diçka për t’u përgëzuar, nuk po ndodh e njëjta gjë me masat lehtësuese që do t’i vinin në ndihmë biznesit, që tashmë është gjunjëzuar në një pritje të padurueshme, duke qenë se çdo ditë që kalon, nënkupton miliona të humbura.
Për të dytën herë, kryeministri Rama ditën e sotme kërkoi kohë për hartimin e një plani të mirëfilltë, ndonëse është e qartë se për të përballuar një situatë të tillë, hartimi i këtij plani duhet të kishte nisur kohë më parë.
Në Britaninë e Madhe, marrja e masave për mbrojtjen e ekonomisë ka nisur që më 11 mars, në ditën që Organizata Botërore e Shëndetësisë e shpalli koronavirusin një pandemi. Ndër masat e marra, janë ndërpreja e taksave për bizneset e prekura, zgjatja e lejeve të paguara për punëtorët që detyrohen të shkëputen nga puna si dhe një skemë kredish të përkohshme për t’i ardhur në ndihmë bizneseve të vogla dhe të mesme.
Situata është e ngjashme dhe në Spanjë ku kryeministri Sanchez ka vendosur një moratorium 6-mujor për taksat e bizneseve të vogla, të mesme dhe për të vetëpunësuarit. Një shumë prej 14 miliardë eurosh është vënë në dispozicion të industrisë prodhuese, ndërsa 400 milionë euro në formë kredish do t’u vihen në dispozicion kompanive pjesë të industrisë së turizmit, që është goditur nga një valë e paprecedentë anulimesh masive.
Në tërësi, ekonomitë më të mëdha botërore po ndjekin thuajse të njëjtën skemë, ku theksi vihet tek pezullimi i pagesave të taksave për bizneset dhe individët, si dhe ofrimi i kredive të buta për bizneset në vështirësi si pasojë e situatës me koronavirusin. Por teksa ekonomia e brishtë shqiptare nuk na e ofron luksin e shifrave të mësipërme, masat fillestare për reduktimin e taksave sikurse ajo e ndërmarrë për pezullimin e pagesave të kredive, janë të mirëpritura.
Deri më tani, lidhur me këtë çështje ka reaguar Unioni i Dhomave të Tregtisë dhe Industrisë (lexo këtu) si dhe Shoqatat e Turizmit (lexo këtu) duke i parashtruar qeverisë propozimet dhe kërkesat e tyre, që deri më tani nuk kanë marrë asnjë përgjigje.
