Atletja shqiptare Luiza Gega e cila doli e dyta në Kampionatin Europian të Atletikës që u zhvillua në Amsterdam të Holandës, u prit mbrëmë në orën 23:15 në e aeroportin e Rinasit.
Nënkampionja bëri krenar çdo shqiptar duke marrë medaljen e argjendit në garën 3000 metra me pengesa. edhe pse mbërritja e saj nga Holanda u pa se ishte larg vëmendjes së organeve shtetërore, qytetarë të thjeshtë dhe sportdashës u mblodhën në Rinas për të pritur kampionen e tyre.
Ata i rezervuan një pritje mjaft të ngrohtë, me flamuj, lule, duartrokitje, urime të përzemërta dhe sigurisht një limuzinë të bardhë luksoze, që do të mundësonte transportin e saj. Deri në një moment dukej se gjithçka po shkonte mjaft mirë, por dy foto të publikuara në rrjetet sociale nga lëvizja “Qytetarët për parkun”, shfaqin prapaskenat e pritjes së atletes në aeroportin e Rinasit.
Në foton e parë shfaqet atletja në limuzinë, ndërkohë që 500 metra më tej ajo del nga makina dhe vijon udhëtimin pa mjetin luksoz.
“Si e shfrytëzon për show, Presidenti i Federatës se Atletikes Gjergj Ruli figurën e sportistes kampione duke e hipur në limuzinë para kamerave dhe duke e zbritur prapë 500 metra me tutje. As rrugën deri në shtëpi nuk i paguajnë”, shkruhet në postimin e lëvizjes “Qytetarët për Parkun”.
Vetë Luiza Gega, vajza dibrane që jeton në Durrës, nuk ka bërë një koment për këtë pjesë. Ajo u shpreh shumë e emociounar për këtë pritje të ngrohtë:
“Faleminderit të gjithëve për emocionet që më dhuruat”, shkruan në profilin e saj në “Facebook” nënkampiona e Europës.
