Ambasadori i Shqipërisë në Kinë, Selim Belortaja, i cili ka ndjekur nga afër situatën shqetësuese në Kinë me Koronavirusin, ka reaguar pasi në Shqipëri u konfirmuan dy rastet e para me COVID-19.
Ai shprehet se kjo gjë kishte për të ndodhur dhe pritej t’i bashkoheshim hartës së kuqe të vendeve ku është përhapur virusi.
Mes të tjerash, ambasadori u bën thirrje shqiptarëve t’i lënë folklorizmat dhe të shkunden mirë para se situata të përkeqësohet më shumë! Mesazhi i tij është të ulemi me këmbë në tokë.
Postimi i plotë:
“Asgjë e re s’ka ndodhur. Ato 2-3 ishujt e vegjël s’mund të qëndronin për shumë kohë gri. Me Italinë ne ishim thuajse “njësh” me avionët dhe tragetet e përditshme. Bashkimi me “hartën e kuqe” aty ishte, sot vetëm sa u zyrtarizua. Kjo është keq sigurisht, por ka dhe një të mirë: uljen tonë me këmbë në tokë!
Mbylljen e stacionit të ..Gallatës! Stop-in e ..qyfyreve, kunjave e shakave tona bajate, të folklorizmave si ..“është si punë gripi, po ..një çikë me i fortë se gripi”! apo “jemi racë e fortë”; te këshillave qesharake si ….”hani limona e pini raki”! “është kot kjo e kot ajo…”, etj.
Ngjeshjes e gajasjes sonë të papërgjegjshme nëpër kafe, restorante, salla, stadiume dhe autobusë edhe ..për 1 stacion! Të gjithë duhet të shkundemi. Ndryshe doemos ..do të na shkundë..”.
