Pamje tronditëse po qarkullojnë nga dje në internet që tregojnë një anëtar të ekuipazhit grek të rojes bregdetare duke shkrepur një armë zjarri në drejtim të një gomoneje të mbushur plot me refugjatë.
Incidenti i ndodhur të martën është cilësuar një përpjekje çnjerëzore e Greqisë për të detyruar refugjatët të kthehen drejt Turqisë, në një kohë që kriza e migracionit sa vjen e thellohet.
Një oficer i veshur me të zeza shihet duke qëlluar me një armë drejt ujit, ndërsa kolegët e tij përdorin mjete të forta për të bllokuar gomonen ku ndodhen edhe fëmijë të vegjël.
Greqia ka paralajmëruar refugjatët të mos hyjnë në vend, duke thënë “Ju do të ktheheni mbrapa, kufiri është i mbyllur”. Ata i kanë bërë thirrje BE-së të ofrojë mbështetje të fortë pasi Turqia njoftoi se do të lejojë miliona refugjatë të shkojnë në Evropë.
Zjarr, tym dhe gaz lotsjellës kanë dominuar vijën kufitare mes Greqisë dhe Turqisë të mërkurën paradite, pasi forcat greke janë përpjekur të zmbrapsin refugjatët.
Bashkimi Evropian vendosi të ndihmojë Greqinë me një fond prej 700 milionë eurosh për të përballuar krizën, që është përshkallëzuar pas disa kërcënimeve nga ana e presidentit turk, Erdogan, për hapje të kufijve.
Greqia e ka quajtur situatën “kërcënim të sigurisë kombëtare”, ndërsa Turqia thotë se ndihet e tradhtuar nga NATO, që nuk po reagon pas asaj që po ndodh në Siri, ku sulmet e forcave qeveritare për të rifituar Idlibin po krijojnë një valë të re refugjatësh lufte.
Që nga fundjava, dhjetëra mijëra refugjatë kryesisht afganë dhe sirianë janë mbledhur në kufirin tokësor 125 milje midis Greqisë dhe Turqisë. Të tjerë kanë marrë përsipër të udhëtojnë për në ishujt e Greqisë, si një mjet për të fituar hyrjen në BE.
Diplomatët e lartë të BE-së u nisën drejt kufirit Greqi-Turqi sot ndërsa luftimet intensive në Siri do të krijojnë radhë njerëzish edhe më të dëshpëruar për të lënë vendin. Grupet për të drejtat e njeriut kanë akuzuar Turqinë për përdorimin e refugjatëve si “patate” duke i shtyrë ata drejt kufirit, por gjithashtu kritikuan Evropën për dështimin e dhënies së ndihmës më të madhe.
