I ftuar në rubrikën “Opinion” në “News24” ishte mjeku infeksionist Pëllumb Pipero, i cili ka bërë të ditur se situata nuk është aq alarmante sa duket.
Numri i personave të prekur nga koronavirusi po rriten ndjeshëm dhe Shqipëria është e ekspozuar ndaj rrezikut, mirëpo Pipero shprehet se situata është ekzagjeruar.
Mjeku infeksionist tregon se Shqipëria i ka marrë masat dhe ka të gjitha kapacitetet për të përballuar rastet e para.
“Situata në aspektin shëndetësor është për t’u vlerësuar seriozisht, ndërsa në aspektin e panikut është e tepërt, e ekzagjeruar. Paniku në këtë rast është aleat i virusit. Jemi në një situatë epidemie të gripit sezonal dhe shenjat e para klinike, qoftë të koronavirusit, qoftë të gripit, janë të njëjta. Pra, qytetarët sulmojnë dyert e spitaleve edhe për gjëra të rëndomta. Asnjë indikator shëndetësor nuk justifikon panikun, pra ka më shumë panik, se rrezik. Është krijuar ky lloj paniku që është i pajustifikuar.
Maska është e nevojshme, mbron shumë mirë personat e tjerë ndaj një të prekuri. Maskat normale nuk e parandalojnë futjen e koronavirusit në rrugë aspiratore, por kufizojnë splektat e pështymës të hyjnë te personat e tjerë. Këto maska, pavarësisht se sa profesionale janë, na mbrojnë në mënyrën maksimalisht të mundshme për të mos e përhapur virusin, por edhe për të mos u infektuar.
Nëse iu referohemi të dhënave, raporti i vdekshmërisë është më pak se 2% në personat e prekur. Nëse kemi 80 mijë të prekur, kemi mbi 2 mijë të vdekur, po të bësh raportin është më pak se 2%. Fakti që në Itali ka gjashtë të vdekur dëshmon se virusi nuk ka hyrë dje në Itali, ka së paku tre javë që është aty. Rastet që kanë humbur jetën janë të prekur kronikë.
Nuk i takon koronavirusit ta quajmë virus vdekjeprurës. Në SHBA, deri tani janë prekur mbi 20 milionë me gripin stinor, mbi 180 mijë të shtruar, dhe mbi 10 mijë të vdekur. Pra, gripi stinor e ka vdekshmërinë dy-tre herë më të lartë se koronavirusi, por me gripin ne kemi dekada që jetojmë me të. Vend për panik nuk ka”- është shprehur Pipero.
Gjithashtu, mjeku ka këshilluar që duart të lahen shpesh dhe të përdoren kartëpeceta kur teshtijmë ose kur kollitemi. Sipas tij, këto janë masat elementare për të parandaluar koronavirusin.
