Është bërë publik rasti i tretë i dyshuar për Koronavirus në Kosovë.
Një grua e cila ishte kthyer nga Italia pas një vizite prej disa ditore, po trajtohet në Klinikën Infektive të Kosovës.
Gruaja është paraqitur mbrëmë në klinikë dhe lajmi është konfirmuar nga vetë ministri i Shëndetësisë, Arben Vitia, i cili tha se pritet që brenda pak orëve, të dalin rezultatet e analizave për të dyshuarën.
“Unë u njoftova që është edhe një rast tjetër i dyshimtë dhe brenda dy orësh pritet të dalin rezultate”, tha Vitia.
Vitia deklaroi se deri tani janë trajtuar 3 raste të dyshuara por që rezultatet kanë dalë negative.
Ministri i Shëndetësisë, Arben Vitia, gjatë përurimit të laboratorit të mikrobiologjisë, tha se është ngritur një Komitet për monitorimin e sëmundjeve ngjitëse në vend, dhe natyrisht edhe Kosova është e rrezikuar nga Koronavirusi.
