Në emisionin “Historia ime” ditën e sotme është trajtuar historia e dhimbshme e një vajze 23-vjeçare nga Gramshi.
Ela Shpata prej vitesh vuan nga një sëmundje e rrallë, e cila sjell varje të lëkurës dhe mjekët nuk e shpjegojnë dot se nga i vjen.
Në emision ajo tha se si fillim e pati infeksion në gojë dhe më pas ai u përhap në të gjithë trupin. Pasi u zhduk infeksioni, ajo pati varje të lëkurës dhe problemin më të madh e ka në fytyrë.
E vetmja mënyrë që ajo të rikthejë fytyrën në gjendjen e mëparshme është vetëm operacioni estetik.
Mirela Milori: Jeni sa vëllezër dhe sa motra?
Ela Shpata: Jemi 7 fëmijë, kam 3 vëllezër dhe jemi 4 motra.
Mirela Milori: Mesa di ke humbur nënën. Sa vjeç ishe kur nëna u nda nga jeta?
Ela Shpata: Isha 10 vjeç kur humba mamin.
Mirela Milori: Iku nga ndonjë sëmundje apo?
Ela Shpata: Po kishte sëmundjen e kancerit!
Mirela Milori: Flasim pak për momentin që ti ke një infeksion në lëkurë? Sa vjeç ishe?
Ela Shpata: Kur isha 15 vjeç fillloi të shfaqej, por më shumë filloi në moshën 18 vjeç.
Mirela Milori: Çfarë ishte?
Ela Shpata: Më filloi nga infeksioni i gojës, më plasi tek gusha, m’u bë si kokrra e vezës. Vajta në Gramsh dhe më thanë për operim, kurse babi tha të shkojmë njëherë në Tiranë, ndoshta mos ka ndonjë zgjidhje tjetër, jo direkt operimi. Vajtëm në Tiranë dhe e kalova me antibiotikë këtë tek qafa, që m’u shfaq. E kurova këtë, pastaj më plasi njëherë tek veshi, vajta e kurova dhe këtë tek veshi dhe kështu ma dha në fillim. Pastaj u bë varja e lëkurës.
Mirela Milori: Për sa kohë vazhdoi që u shfaq njëherë në gojë, pastaj në qafë, në vesh?
Ela Shpata: Aty krijohej, aty përsëritej!
Mirela Milori: Deri në çfarë moshe vazhdoi?
Ela Shpata: 18 vjeç u shfaq më shumë deri në këtë moshë që jam 23.
Mirela Milori: Tani nuk vuan më nga infeksioni, por ti thua që të ka lënë vetëm varje lëkure?
Ela Shpata: Tani më ka lënë vetëm varje lëkure.
Mirela Milori: Por mjekët çfarë thonë për sa i përket infeksionit?
Ela Shpata: Mjekët më thonë që nuk ka kurë për këtë, e vetmja gjë është me operacion, më kanë thënë deri tani.
Mirela Milori: Po për faktin që ty të doli një infeksion në gojë dhe pastaj i dha shenjat në grykë dhe në veshë? Çfarë diagnoze të kanë dhanë mjekët, pse të shfaqej?
Ela Shpata: Ky është problemi që nuk e kanë gjetur nga se vjen, nga se është bërë, vetëm më kanë thënë infeksion lëkure kaq, që nuk ka kurim. Edhe po të kurohet thotë është një gjë që përsëritet dhe e vetmja gjë është vetëm operacion.
Mirela Milori: Vetëm operacioni estetik, për të bërë ngritjen e lëkurës. /tvklan.al
