Mbrëmjen e kaluar, moderatorja shqiptare Alketa Vejsiu realizoi ëndrrën e saj prej vitesh dhe gjithashtu krenoi vendin e saj me pjesëmarrjen në festivalin italian “Sanremo”.
Ajo prezantoi krah moderatorit të famshëm Amadeus dhe partneres së Cristiano Ronaldo-s, Georgina Rodriguez, duke i lënë të gjithëve mbresa me lirshmërinë dhe elokuencën e saj në të folur në gjuhën italiane.
Gjatë festivalit, Alketës iu dha edhe një hapësirë kohore për të mbajtur një monolog të gjatë e domethënës, duke treguar historinë e shqiptarëve e duke falenderuar Italinë që hapi dyert për popullin tonë.
Monologu i plotë i Alketa Vejsiut:
“Na ishte një herë një vend ku të dëgjoje Baglioni-n dhe Celentano-n ishte e ndaluar. Bëheshe armik i popullit. Mund të të kushtonte lirinë, mund të përfundoje në burg.
Na ishte një herë një vend, ku të ishe bionde, ishe e dyshuar, sepse bionde ishte Raffaella Carrà.
Na ishte një herë një vend, ku mësohej italishtja duke dëgjuar çdo minutë transmetimet e Rai-t, ku Sanremo ishte gjithmonë Sanremo, edhe kur ishim të detyruar ta ndiqnim fshehurazi, pasi kishim mbyllur mirë dyert dhe dritaret.
Duket absurde, por ky ishte vërtet çmimi që duhet të paguaje, nëse jetoje në vitet e diktaturës.
Unë jam sot këtu për të thënë faleminderit. Faleminderit Itali, që mbajte ndezur ëndrrat tona në atë epokë të errët. Sepse ju nuk na braktisët kurrë. Nuk e bëtë kur kishim nevojë, kur merrnim anijet për të kaluar kufirin, në mënyrë që të kishim, më në fund, mundësinë për të jetuar.
Faleminderit Itali, sepse na ke dhënë shumë. Ke ndriçuar rrugën tonë me kulturën, artin, bukurinë dhe muzikën tënde.
Nëse jam sonte këtu, në këtë skenë, është për të thënë faleminderit Sanremo, sepse për të gjithë ne që të kemi ëndërruar përtej detit, nuk je vetëm tempulli i këngës, por edhe një simbol. Një shembull integrimi, ku një djalë i ri, i nisur me anije, që zbarkoi këtu në Itali, realizoi atë që mund të dukej e pamundur, të fitonte festivalin. Ai djalë që është tanimë një emër i madh i muzikës italiane, quhet Ermal Meta. Me fitoren e tij në vitin 2018, ai ekzaltoi shpirtin dhe krenarinë e shqiptarëve.
Ne nuk bëjmë gjithmonë tifo për muzikën tuaj, por për gjithçka që ju përket.
Ne, edhe në botërorin e futbollit, sa herë që të kaltërit shënojnë gol, e shohim si një gol edhe për ne.
Muzika nuk i njeh kufijtë që ndajnë popujt dhe kombësitë.
Muzika nuk ndërton mure dhe nuk krijon diga.
Muzika nuk ka nevojë për pasaporta, flamuj, thjesht përhapet dhe i këndon dashurisë, ëndrrave, jetës dhe na mëson të fluturojmë.
Sot që vendi im është pjesë e familjes së madhe europiane, unë fluturova për këtu, për të qenë brenda ëndrrës sime.
E ndërsa flas, më vjen në mendje ajo vajza e vogël që pyeste të atin pse e donte kaq shumë një këngë që Bobby Solo e kishte kënduar këtu, “Una Lacrima sul viso”. Im atë më tregoi se teksti fliste për një lot që dilte nga një zemër e thyer që rritet e bëhet një det. Unë asokohe iu përgjigja me naivitetin e një fëmije: “Ah, ja pse loti është i kripur!”
Për mua ai lot u bë metafora që la shenjë në fëmijërinë time, me tragjedinë e përsëritur të kanalit të Otrantos, që mori jetë njerëzish, të mbytur në shpresën e të gjeturit në kufi “tokën e premtuar”.”
Pas monologut, të cilin mund ta shihni në videon e siguruar nga “Iconstyle.al”, Alketa ka nisur të këndojë “Una lacrima sul viso”, ndërsa në strofën e dytë i është bashkuar edhe këngëtari Bobby Solo.
