Ambasadori i Shqipërisë në Kinë ka treguar se situata me Koronavirusin është tejet shqetësuese dhe përhapja e tij nuk është ndalur aspak.
Në një postim të tijin në rrjetet sociale, Selim Belortaja tregon se numri i të infektuarve rritet me 3000 në ditë ndryshe nga sa raportohet.
Ai shprehet se NUK ka ende një ilaç për Koronavirusin dhe se raportimi në Kinë lë për të dëshiruar.
Ambasadori u tërheq vëmendjen bashkëkombësve shqiptarë që të tregojnë kujdes dhe të respektojnë rregullat e autoriteteve si dhe ato higjieno-sanitare.
Belortaja u bën thirrje shqiptarëve në Kinë të marrin në dorë vetë zgjedhjen për vendqëndrimin këto javë, pasi sipas tij “askush nuk ka zbuluar ndonjë formulë që s’jua tregon “.
Postimi i plotë i ambasadorit:
“Në kohë epidemish e krizash është e pritshme që të plasin të dyja: edhe ekzagjerimet (deri në tablo apokaliptike!) por edhe euforia dhe shpartallimi i virusit ..me rrahje gjoksi e recitime! Qarkullon dhe një video këngë këto ditë ”pop-style”, kur pas çdo strofe, një grafikë grushti e dërgon në djall virusin ..vetëm me një uppercut! Lulëzojnë mitet dhe imagjinata dhe pak hapësirë ngelet për shkencëtarët e vërtetë që po luftojnë të gjejnë rrënjët e virusit, izolimin e tij, ilaçin për shërim, dhe masën mbrojtëse për më tej.
Jam i shtrënguar ta ndërhyj sërish për përgjegjësinë që kemi ndaj bashkëkombësve këtu. Shpërthimi i nCoV nuk është ndalur aspak. Nuk ka ende një ilaç kundër nCoV!! (shif OBSh bashkangjitur). Numri i të infektuarve rritet me rreth 3000 në ditë (gjithsej raportohen 20.613). Ndërsa vdekjet ditore shkojnë 50-60 (65 vdekje ditën qe shkoi). 427 shifra gjithsej. Jo vetëm udhëheqja e qeveria, por e gjithë shoqëria kineze i është dedikuar këtij prioriteti absolut: stopimit te epidemisë dhe gjetjes se formulës shkencore për shërimin. E hapur ndaj bashkëpunimit ndërkombëtar. Por ende pa ndonjë deklaratë Relaksi e ..Zgjidhjeje!
Sot që flasim nuk kemi kurrfarë arsye për eufori. I drejtohem sidomos motrave e vëllezërve shqiptarë ne Kinë. Sado të ashpra e vështirësuese që po bëhen për jetën e përditshme: ndiqni e respektoni kufizimet, rregullat e rekomandimet e autoriteteve këtu: administrative e higjieno-sanitare. Ato dinë më shumë se ç’bëhet këtu. E dyta, merreni në dorë vetë zgjedhjen tuaj për vendqëndrimin këto javë! askush nuk ka zbuluar ndonjë formulë që s’jua tregon juve! Askush s’ka ndonjë platformë shtetërore të rezervuar! Merrni vendim të pjekur.
Ndiqni se paku Faqen e OB Shëndetësisë! Raportimi këtu (foto bashkangjitur) është vjetruar tashmë. Sot ka shifra të tjera. Të jemi optimiste në vullnetin e kapacitetet e Kinës dhe përpjekjen e përbotshme është vetëm njëra anë. Tjetra është persistenca e pashembullt e këtij virusi. Uroj shëndet e fat të mire për gjithkënd, në Shqipëri, Kinë e anekënd botës.” shkruan Belortaja.
