Producenti Ardit Gjebrea premtoi se fitimet e festivalit të tij “Kënga Magjike” të këtij viti do të shkonin për ndërtimin e dy shtëpive për familjet e prekura nga tërmeti.
Duket se premtimi është mbajtur dhe në llogarinë e tij në Instagram Gjebrea ka ndarë detajet nga proçedurat e ndërtimit.
Producenti ka treguar se po përgatit dokumentat e rregullta dhe po pritet leja e bashkisë, për të ndërtuar dy shtëpitë në Thumanë.
“Kjo foto e bërë dje, është në bashkinë e Krujës, për të vijuar punën për 2 shtëpitë që do ndërtojmë në Thumanë.
Nuk dua të ndërtoj shtëpi “partizançe”, por gjithçka me dokumenta të rregullta.
Dhe as nuk dua të përfitoj sepse jam njeri publik dhe futem pa rradhë. Po të tjerët???!!! Pallatet kanë patur preçedencë!
Por tashmë komisioni i verifikimeve brenda javës së ardhëshme (që na vjen rradha) do japë OK që shtëpitë që kam marrë përsipër janë të pabanueshme dhe më pas do prishen. Ndërkohë projektet janë gati për të dy shtëpitë dhe pasi të merret leja nga Bashkia (më premtuan shumë shpejt) do fillojë ndërtimi i dy shtëpive të cilat siç kam premtuar, brenda 4 muajve do të përfundojnë.”- shkruan Gjebrea krahas fotos.
