Një grup myslimanësh ka udhëtuar drejt vatrave të zjarrit në Victoria, Australi, për të ofruar mbështetje për ata që janë prekur nga flakët shkatërruese dhe për zjarrfikësit.
Anëtarët e Shoqërisë Islame të Newport gatuan ushqime për zjarrfikëset e rraskapitur në Brigadën e Vullnetarëve të Johnsonville, gjatë fundjavës.
Zjarrfikësit e guximshëm kanë punuar pa u lodhur për të kufizuar përhapjen e flakëve që kanë qenë të tërbuara në East Gippsland javën që shkoi.
“Ishte shumë prekëse të shikoje sesa të lodhur ishin. Ata ishin thjesht të rraskapitur”, tha vullnetari Lookman El Kurdi për Daily Mail Australia.
Së bashku me gatimin, grupi gjithashtu solli pesë kamionë me sende shumë të nevojshme për t’u shpërndarë në të gjithë rajonin.
Qindra shtëpi janë shkatërruar si rezultat i zjarreve në lindje të Gippsland.
Shumë komunitete janë shpërngulur si rezultat i përhapjes së zjarrit, përmasat e të cilit kanë shkuar në atë të shtetit të Kroacisë.
Australia po përballon një nga fatkeqësitë më të mëdha natyrore, me zjarret që kanë nisur nga shtatori, temperaturat ekstreme dhe thatësirën që vijon prej muajsh.
