Një ngjarje e rëndë ka ndodhur natën e ndërrimit të viteve në një familje shqiptare në Yarraville, Melbourne, ku babai ka qëlluar për vdekje me armë zjarri të bijën dhe bashkëshortin e saj.
Dyshohet se shkak për tragjedinë është bërë një konflikt mes dy palëve në prag të festës.
55-vjeçari Osman Shaptafaj ka qëlluar me armë zjarri fillimisht të bijën 25-vjeçare Lindita Musai e cila ka gjetur vdekjen në vend, e më pas partnerin e saj, 29-vjeçarin Veton Musai, i cili u nda nga jeta ditën e djeshme në spital.
Pas aktit të rëndë, 55-vjeçari ka tentuar të vrasë veten dhe vijon të jetë në gjendje të rëndë në spital.
Ngjarja është pasqyruar gjerësisht në mediat australiane ku thuhet se çifti i ri prej pak kohësh kishte festuar përvjetorin e parë të martesës.
Ekzekutimi ka ndodhur në oborrin e shtëpisë së çiftit Musai, që na ato momente kishin miq të ftuar teksa përgatiteshin për festën e ndërrimit të viteve.
Miqtë dhe familjarët e Linditës dhe Vetonit janë shprehur të tronditur për mediat vendase, ndërkohë që policia është ende duke hetuar për të zbardhur arsyet pas vrasjes së dyfishtë.
