Ka kaluar thuajse një muaj që nga tërmeti i 26 nëntorit, dhe plagët e kësaj tragjedie të rëndë ende nuk janë mbyllur!
“Iconstyle.al” ishte së fundi në fshatin Luz të Fushë-Krujës, aty ku dy gra dhe një fëmijë 2 vjeç, flinin jashtë në të ftohtë.
Ela, e cila është nusja e shtepisë, jeton me vjehrrën dhe vajzën 2-vjeçe në një çadër jodimërore që nuk ka as kushtet minimale për t’u ngrohur sadopak tani që jemi në dimër. Bashkëshorti i Elës është në burg, në pamundësi për t’iu gjendur pranë familjes, e cila duket se është harruar dhe nga shteti.
Banesa e tyre është gati duke rënë, ka çarje të mureve për të mos përmendur pamjen e frikshme që ofron tavani i cili është harkuar komplet duke rrezikur këdo që qëndron poshtë tij.
Nga shteti nuk kanë marrë asnjë ndihmë, përpos një paralajmërimi nga inxhinierët që bënë inspektimet, që të mos futen brenda në banesë. Po ku të shkojnë?
Dy gratë dhe vajza e vogël kanë nevojë për një shtëpi me qira në Fushë-Krujë.
Vjehrra e Elës e ka të pamundur qëndrimin jashtë në temperatura të ftohta dhe lagështirë, pasi vuan nga probleme shëndetësore të rrugëve të frymëmarrjes.
Vajza e vogël ka gjithashtu nevojë për një ambient të ngrohtë ku të flejë e qetë dhe të rritet e shëndetshme!
Shpresojmë që autoritetet të marrin masa për t’i ardhur në ndihmë kësaj familje që ka nevojë ta kalojë dimrin me një çati mbi kokë!
/Iconstyle.al
