Ish-deputetja e Partisë Socialiste, Ledi Shmaku, ka publikuar në llogarinë e saj në Facebook letrën e një vogëlusheje italiane, e cila ka mësuar për tërmetin shkatërrues në Shqipëri.
Kështu, ajo është solidarizuar me të gjithë fëmijët e vendit tonë, duke shkruar për ta një letër plot dashuri.
Ajo i është drejtuar punojësve të Mbrojtjes Civile, duke i kërkuar ta dërgojnë letrën në Shqipëri, si dhe ka bashkëngjitur edhe 5 euro që fëmijët të hanë të paktën mëngjesin.
“E dashur Mbrojtja civile e Belluno-s. Unë jam Emily e sot kur u zgjova në mëngjes dëgjova në lajme për lajmin e keq.
Mami im që tani është duke pirë kafe , më shpjegoi se në Shqipëri pati një tërmet të fortë.
Unë imagjinova ata fëmijë që po flinin në krevatet e tyre të ngrohta, pranë mamit a babit o pranë vëllezërve të tyre, e do jenë trembur shumë.
Më vjen kaq keq e uroj të mos dëgjoj më lajme të tilla në televizor. Nga frika ata fëmijë nuk do të kenë ngrënë as mëngjes.
Unë nuk jam shqiptare por dua t’u them atyre fëmijëve se dëshiroj të jem mikja e tyre e zemrës. Nuk di si t’ja bëj e dua që ju të më ndihmoni t’i dërgoj fëmiëjve të Shqipërisë këtë pikturën time që ata ta shohin se unë i kam menduar e më vjen shumë keq për atë cfarë u ka ndodhur.
Shpresoj që të jenë përsëri të qetë e të lumtur me familjet e tyre. Ju përshëndes fëmijë shqiptarë e po ju nis dhe 5 euro kështu që nesër të hani mëngjes”- shkruhej në letrën e Emily-t.
