Deputetja Edlira Hyseni është prekur gjatë fjalimit të saj në Kuvend, teksa bënte thirrje që qeveria të ndihmonte që qyteti i Durrësit t’i rikthehej normalitetit.
Hyseni u shpreh se pas tragjedisë nuk ka më vend për ndarje politike, pasi njerëzit e frikësuar kanë nevojë të besojnë tek qeveria më shumë se kurrë.
“Isha përgatitur të flisja për buxhetin por jemi në një situatë ndryshe nga ç’kemi qenë. Unë jam prind, jam nënë dhe në këtë situatë patëm emergjencën të kujdeseshim për jetën. Në katër të mëngjesit nuk kishte ndarje politike. Njerëzit kanë humbur shumë në të gjitha drejtimet dhe sot Durrësi ka nevojë të rigjejë besimin. Durrësi ka nevojë për një shtet dhe një qeveri që do t’i përgjigjet. Durrësi ka nevojë për dashuri.
Unë nuk dua të besoj që do preken ato lekë për personat e prekur nga tërmeti. Durrësi ka nevojë edhe për të gjetur drejtësi por prioritet është rikthimi në normalitet. Shkollat në Durrës janë të dëmtuara. Prindërit kanë frikë të rikthejnë fëmijët në shkollë. Kanë rënë pallate që janë ndërtuar në 10-vjeçarin e fundit. Kemi nevojë të besojmë tek qeveria”- u shpreh e përlotur deputetja gjatë fjalimit të saj.
