Kryetarja e Bashkisë së Durrësit, Valbona Sako ka dhënë dorëheqjen pas deklaratës së hidhur që dha në një intervistë në lidhje me viktimat e tërmetit.
Në një prononcim për gazetaren e “Top Channel”, kryebashkiakja e Durrësit u shpreh se tërmetet e tjera në botë kanë shkaktuar me mijëra viktima, kështu që duhet të jemi të kënaqur me kaq.
“Ky ishte një tërmet shkatërrimtar. Por të jemi të kënaqur edhe me 50 viktima pasi në raste të tjera kanë qenë mbi 100 viktima”.
Kryebashkiakja shtoi se ato hotele, këta njerëz nuk do t’i paguanin dot as për pushime.
“Janë hotele me 5 yje, që në kushte normale zotërinjtë nuk do të mund t’i paguanin për pushime”, shtoi Sako më tej.
Pavarësisht se u mundua të sqarojë se ishte vetëm një keqinterpretim i mediave, vendimi i saj për të dorëzuar postin është i prerë!
“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. Falenderoj nga zemra të gjithë ata që më besuan dhe shpresoj në mirëkuptimin e të gjithëve”, shkruan ajo në Facebook.
