Kryeministri Rama ka bërë një thirrje në llogarinë e tij në Twitter, duke i bërë thirrje për bashkëpunim opozitës në këtë situatë të jashtëzakonshme.
Rama ka kërkuar që të ulen së bashku në tryezë për të diskutuar dhe për të gjetur një zgjidhje për popullin shqiptar, i cili është në ditët e tij më të errëta.
“U bëj apel forcave opozitare të ulemi pa humbur kohë në tryezë për të dëgjuar idetë dhe propozimet e tyre konkrete.Në këto rrethana të jashtëzakonshme duhet mbiprodhim energjish pozitive për fatkeqët që kanë humbur gjithçka e mbarë popullin që meriton përkujdesje psikologjike.
Është koha e bashkimit konkret sepse vetëpërmbajtja në fjalor, sado e mirëseardhur është krejt e pamjaftueshme! Të ulemi për shqiptarët dhe t’u japim mesazhin e qetësisë, durimit, sigurisë se askush nuk do të jetë vetëm në këtë luftë për mbijetesë. Unë jam gati!
Për çdo gjë ka një kohë nën këtë qiell; një kohë me lind e një kohë me vdek; një kohë me i mledh e një kohë me i largu gurët;një kohë me rrëzu e një kohë me ngrit;një kohë me fitu e një kohë me hum;një kohë me u luftu e një kohë me u paqtu..Kjo është koha me u ftillu.”- janë fjalët e kryeministrit, i cili ende nuk ka marrë një përgjigje nga opozita.
