Është rritur numri i viktimave nga tërmeti shkatërrues i mëngjesit të së martës.
Bilanci tragjik ka shkuar në 40 persona, ndërsa janë nxjerrë të gjithë trupat e pajetë nga rrënojat në Thumanë.
Kërkimet nuk janë ndalur pavarësisht motit me reshje shiu, ndërsa janë përqendruar më tepër në zonën e Kënetës në Durrës, ku po kërkohen 5 persona.
Forcat speciale janë përqëndruar në një perimetër të kufizuar kërkimi në vilën e shembur të familjes Lala.
Në këtë familje jetonin 2 vëllezër me familjet e tyre dhe prindërit dhe prej dy ditësh vetëm një person është nxjerrë i gjallë nga banesat, djali 17-vjeçar i njërit prej vëllezërve.
Një grua nxirret e pajetë nga rrënojat në lagjen 18 në Durrës
Rozeta Meçja është nxjerrë e pajetë nga gërmadhat e godinës 6 katëshe pranë Kryqit të Kuq. Gjatë këtij momenti ka qenë i pranishëm edhe bashkëshorti i saj Ajeti i cili ka shpërthyer në lot sapo ka parë bashkëshorten e pajetë. 
