Është zbuluar më në fund tema e veshjes së yjeve në “Met Gala 2020”.
Andrew Bolton, kuratori përgjegjës i Institutit të Kostumeve në Muzeun Metropolitan në New York, ka njoftuar se ekspozita e pranverës së vitit të ardhshëm, e njohur ndryshe si nata më e madhe në kalendarin e modës, do të përqendrohet te koha.
“Moda dhe Kohëzgjatja” është tema që do të orientojë të famshmit për përzgjedhjen e veshjes së tyre në përvjetorin e 150-të të “Met Gala”.
“The New York Times” ka zbuluar se veshjet do të frymëzohen pjesërisht nga Virginia Woolf dhe teoritë e filozofit francez të fillimit të shekullit të 20-të, Henri Bergson.
Ekspozita do të shfaqë 160 veshje të grave nga 150 vitet e kaluara.
“Moda është pashmangshmërisht e lidhur me kohën”, tha Bolton. “Ajo jo vetëm që pasqyron dhe përfaqëson frymën e kohërave, por gjithashtu ndryshon dhe zhvillohet me kohën”.
