Pedagogu Ilir Ciko i është kundërvënë koleges së tij, pedagoges së gazetarisë Iris Luarasi, e cila e ftuar dje në emisionin “Shiko kush Luan”, zbuloi emra personash të njohur të ekranit që i ka ngelur në lëndën e saj.
Ajo përmendi emrat e Arbana Osmanit, apo Jonida Shehut, por ky veprim i saj është kritikuar nga Ciko, i cili ka shkruar se duhen vendosur rregulla të reja loje për të mos cënuar pa të drejtë privatësinë e të tjerëve.
Postimi i plotë:
Nuk e kam kuptuar asnjëherë se si një person që e quan vehten pedagog mund të bëjë publike, madje me krenari e në emisione televizive, emra personash që i ka ngelur në lëndën e tij/saj, aq më tepër kur këta janë po aq, a në mos edhe më të njohur për publikun.
Kam 16 vite që kam përcjellë breza studentësh e në ato raste kur kam qenë i shtrënguar për të mos i kaluar, jam i sigurt që askush tjetër veç studentit dhe administratës së universitetit nuk është informuar për vlerësimin përkatës.
Nëse normat e etikës është vështirë të funksionojnë, besoj se duhen vendosur rregulla loje për të mos cënuar pa të drejtë privatësinë e të tjerëve.
