Historia e Alvinit 11-vjeçar, i cili u dërgua në Siri nga nëna e tij e radikalizuar 5 vite më parë ka prekur të gjithë.
Historia u tranmetua në puntatën e fundit të emisioni “Le Iene” në Itali.
Stafi i emisionit kishte mundësuar në takim mes Afrim Berishës dhe djalit të tij, në kampin “Al-hol” në Siri.
Babai i Alvinit bën thirrje për t’i kthyer djalin në shtëpi.
Autoritetet italiane nuk mund të bëjnë asgjë, pa ndërmjetësimin e një përfaqësuesi të ambasadës shqiptare.
Ndërsa orët kalojnë jeta për Alvinin bëhet gjithmonë e më e pasigurtë, pasi kampi ndodhet në zonën ku ushtria turke po kryen bombardime.
Babai i Alvinit ka dërguar një letër përmes avokatit të tij Darien Levani, në redaksinë e “Faxnews”. Ai kërkon ndihmë për kthimin e djalit të tij, ndërsa thotë se koha nuk premton.
Në vijim letra plotë:
Alvin Berisha është një fëmijë shqiptar i cili aktualisht ndodhet në Siri pranë kampit Al Haël.
Në vitin 2014, kur ishte vetëm 5 vjeç, Alvini është çuar në Siri nga e ëma, pa dijeninë e babait. I ati, Afrim Berisha, nuk ka kaluar ditë pa e kërkuar. As lufta, as frika, as largësia, as pengesa ekonomike e as ISIS nuk e kanë ndaluar, me bindjen e me dashurinë që vetëm një baba mund të ketë. Pas pesë vitesh, në 25 shtator 2019, e ka gjetur Alvinin në kamp, e ka përqafuar fort dhe i ka premtuar që tani nuk do ndaheshin më. Por forcat kurde që ruajnë kampin nuk e kanë lejuar që ta marrë me vete, sepse për këtë duhet që aprovimi të kërkohet dhe të merret nga Shteti shqiptar.
Alvini është vetëm 11 vjeç, Alvini është i plagosur e ka nevojë për mjekim urgjent, Alvini është i vetmuar, Alvini është i trembur, Alvini duhet të largohet sa më shpejt nga Siria.
Institucionet kompetente shqiptare janë në dijeni të kësaj situate dhe po punojnë për të mundësuar kthimin e tij në Shqipëri. Kemi besim të plotë tek puna që po bëjnë si për Alvinin, si për të gjithë qytetarët e tjerë shqiptarë që ndodhen aktualisht në Siri. Kemi besim dhe shpresë që nëse të gjithë bëjnë punën e tyre, Alvini do kthehet së shpejti. Por jemi edhe të shqetësuar, sepse lufta në Siri po ashpërsohet dhe koha nuk premton. Në Al Haël ndodhen plot 73.000 veta që jetojnë në një situatë të tmerrshme, e kjo na tremb. Nëse sot e bëjmë dhimbjen tonë publike, e bëjmë këtë vetëm për t’ju lutur kujtdo mund të na ndihmojë, që të na ndihmojë: duke punuar më shpejt, duke na dhënë informacione mbi gjendjen e Alvinit, duke na mbështetur qoftë edhe me një fjalë të mirë.
Sot lutemi e kërkojmë ndihmë. Nesër, larg qoftë i ndodh diçka Alvinit, do kërkojmë llogari.
Me respekt
Afrim Berisha
Avv. Darien Levani
Celulari shqiptar: 00355 06933447510
Celulari italian: 0039 3295327386
Ndërkohë ministri i Jashtëm, Gent Cakaj, në një deklaratë për mediat, tha se ka një angazhim maksimal të qeverisë për zgjidhjen e kësaj çështjeje.
Ndër të tjera ai bëri thirrje që kjo çështje të mos keqpërdoret, pasi i kalon kufinjtë e diplomacisë.
/Gazeta Reforma
