Ajo që duhej të niste si një histori dashurie e pastër në një librari mes Joe-t dhe Beck-it, kthehet në një histori të frikshme përndjekjeje që na tregon se ka një kufi midis dashurisë që ndjen për dikë dhe fiksimit!
Aktori i famshëm i serialit “Gossip Girl” (Penn Padgley) rikthehet në serialin e ri thriller psikologjik “You”, ku luan rolin e një menaxheri në një dyqan librash, që fiksohet aq shumë pas një vajze me emrin Beck, (Elizabeth Lail) saqë pas 5 minutash e gjen veten të gatshëm për të bërë çdo gjë, që të sigurojë të ardhmen që AI imagjinon me të.
Dhe kush është mënyra më e thjeshtë për të mësuar çdo gjë rreth kujtdo në kohën e sotme? Interneti!
Seriali i vitit 2018, që bazohet në librin me të njëjtin titull të Caroline Kepnes, do të hapë rubrikën tonë rreth filmave dhe serialeve që do të vijë çdo të hënë!
“You” hedh dritë mbi mënyrën sesi sillemi ne në mediat sociale dhe se sa të ekspozuar jemi përmes tyre. Jemi ne ata që themi se duam privatësi, por nga ana tjetër çdo gjë që dëgjojmë, hamë apo ku shkojmë, është e aksesueshme nga kushdo përmes një vale Wi-Fi.
Po ashtu, ky serial na shtyn të besojmë te ato dashuritë e mëdha, ku dikush do të bënte çdo gjë për të fituar dashurinë e tjetrit, derisa kuptojmë se ai dikushi është në të vërtetë i çmendur dhe shkon deri në ekstrem.
Kështu, Joe nis të përdorë mediat sociale për të gjetur informacione intime për bjonden bukuroshe Beck, e cila aspiron të bëhet shkrimtare. Ai e sheh si një ftesë faktin që Beck e ka profilin e hapur, pasi ashtu siç shprehet: “nëse profilin në rrjetet sociale e ke publik, ti dëshiron të të shohin, dëgjojnë dhe njohin!”
Joe zbulon ku jeton Beck, ku studion, me kë takohet, cilat janë shoqet e ngushta dhe cilat janë ato që bëjnë sikur janë shoqe të ngushta, dhe është aty për t’i thënë se ai është i duhuri dhe po vjen si një princ i kaltër për ta shpëtuar.
Vetëm se ka një problem! Ish-i i Beck-it, Benji! Po ky nga doli?!
E veçanta e serialit është se narracionin e bën (në mënyrë të përkryer) vetë personazhi kryesor, Joe. Thuajse i gjithë seriali është i bazuar te zëri i tij i brendshëm që e dëgjojmë vetëm ne (fatmirësisht) përndryshe filmi do të ishte një qetësi e plotë.
Imagjinata e Joe-t, humori dhe ndjenjat e tij që shpalosen jo me zë të lartë por përmes monologut të brendshëm, të bëjnë të harrosh se ke të bësh me një maniak që ruan Beck-in nga dritarja e shtëpisë së saj, që i vjedh dhe hack-on telefonin e saj dhe i hyn brenda në shtëpi.
Joe ia mbush mendjen vetes se ai është i vetmi mashkull në botë që meriton Beck dhe kur sillet si i tillë, has pengesa, si ajo e shoqes së Beck-it, Peach, (Shay Mitchell).
Nëse dhe ty të pëlqejnë djemtë si Joe!
Një provë e madhe që ky serial është briliant lidhet me faktin se ka krijuar ndasi në mesin e shikuesve. Ka nga ata që e shohin Joe-n dhe e gjykojnë karakterin e tij si “stalker dhe vrasës”, ka të tjerë që e adhurojnë atë dhe duan që Joe dhe Beck të përfundojnë bashkë (nuk do ta them nëse kjo ndodh apo jo).
Ky serial është bërë shkas që aktorja e njohur Millie Bobby Brown të kritikohej nga fansat sepse mbrojti karakterin e Joe-t dhe veprimet e tij prej një psikopati, duke i justifikuar ato me faktin se “është i dashuruar”. Por ajo nuk është e vetmja që ra në kurthin e Joe-t, ndaj vetë aktori u desh të reagonte përmes disa postimeve:
A: He is a murderer https://t.co/g2g4f3JvaF
— Penn Badgley (@PennBadgley) January 9, 2019
Seriali, i cili ka premtuar një sezon të dytë, trajton një mori temash me të cilat ndeshemi çdo ditë që nga tradhtia, xhelozia, sekretet, profesori që u kërkon studenteve seks për t’i ndihmuar, dhuna në familje etj. Të gjitha këto i bëjnë personazhet e tij të mos ndahen në pozitivë dhe negativë, por t’i kenë të dyja anët.
E gjithë historia e sjellë përmes 10 serive, të mbërthen pas ekranit dhe krijon suspancë: Do ta kapin apo jo!
“You” është një super serial dhe një kujtesë e fortë për të gjithë ne që i kemi profilet publike dhe harrojmë t’i mbyllim perdet natën kur jemi në shtëpi!
Epo, shikim të këndshëm!
/Iconstyle.al
