Shqiptari 27-vjeçar i cili akuzohet për tentativë vrasje ndaj 33-vjeçares moldave, Aliona Oleinic ka dalë përpara gjykatës.
Roland Bushi u arrestua pasi i nguli 11 herë thikën gruas.
Në dëshminë e tij, Bushi është shprehur se gjithçka e bërë për dashur dhe ishte një moment inati.
Gjatë seancës, shqiptari ka shprehur pendesën për krimin, por kjo nuk e ka bindur prokurorin e çështjes, i cili ka kërkuar masën e sigurisë “Arrest me burg”, shkruan “Ilmattino”.
Shqiptari tha përpara gjykatës se nuk kishte si qëllim që ta vriste moldaven, por donte vetëm që të fliste me të, pasi nuk dëgjoheshin prej ditësh.
Të henën kur po shkonte në punë, Bushi është kthyer tek shtëpia e moldaves, pasi kishte njohje me të.
Kjo e fundit ka refuzuar që t’i hapë derën, ç’ka ka nervozuar shqiptarin, i cili ka kapërcyer gardhin e jashtëm dhe është futur në oborr.
Pasi nuk e bindi dot, që të nisnin një marrëdhënie bashkë, 27-vjeçari humbi toruan dhe e goditi 11 herë me thikë në gjoks dhe në bark.
Shqiptari dhe moldavia ishin njohur 8 muaj më parë nëpërmjet Facebook-ut.
Bushi kishte shkuar disa herë në lokalin ku punonte moldavia, madje kishte shpenzuar edhe para, vetëm për ta parë.
Të dy ishin bërë miq, madje shqiptari, i cili punonte murator, e kishte përcjellë edhe disa herë në shtëpi.
Megjithatë 33-vjeçarja e konsideronte si shok, madje në disa raste nuk i fliste prej ditësh, siç kishte ndodhur edhe pak përpara krimit.
Kjo ishte një dashuri e njëanshme, e cila kishte shkaktuar zemërim te shqiptari, i cili nuk e duroi dot refuzimin.
Për shkak se ai shfaqi pendesë në gjykatë, procesi ndaj tij mund të bëhet me gjykim të shkurtuar.
Burimi: Gazeta Reforma
