Bashkëshortja e kryeministrit Edi Rama ka dhënë një intervistë ekskluzive për “Together Magazine”, ku ka folur me optimizëm për vendin e saj dhe në veçanti femrat shqiptare.
Pasi i kërkuan që të japë 3 këshilla për gratë dhe vajzat, të cilat janë dorëzuar në përpjekje për të arritur endrrat e tyre, Linda Rama solli në vëmendje shembullin e të famshmes Ermonela Jaho.
Ajo tregoi se dikur askush nuk e merrte seriozisht Ermonelën, por ajo këmbëngulte me ëndrrat e saj për të kënduar në të ardhmen në La Scala dhe sot është një yll i skenës ndërkombëtare.
“Nëse duhet t’i përgjigjem me doemos pyetjes tuaj me një recetë për gratë dhe vajzat në vështirësi, së pari do t’iu kërkoja ndjesë atyre dhe do t’iu lutesha që nëse qëllon të më lexojnë, të mos i marrin fjalët e mia si këshillat e dikujt që i jep atyre mend! Sepse ato kanë mençurinë e veçantë të vuajtjes së tyre dhe iu duhet vetëm një mundësi, një shans, një dorë e shtrirë, të cilën duhet ta kërkojnë me forcën e ëndrrës e të shpresës së tyre për ndryshim.
Kam njohur një vajzë që ishte askushi dhe askush nuk e merrte seriozisht, kur ende adoleshente e bijë e një familjeje të zakonshme, thoshte që një ditë do të këndoj në La Scala! Ajo quhet Ermonela Jaho dhe arriti të këndojë në La Scala e të ngjitet në yjet e skenës operistike botërore, duke u nisur nga rrugica plot baltë e shtëpisë së saj, në Tiranën e zymtë të viteve ‘90”.
Linda Rama u shpreh gjtihashtu se sot ka shumë gra në botë, të cilat janë kampione të aktivizmit dhe të përfaqësimit gjinor, duke inspiruar dhe duke mundësuar shumëçka që deri dje dukej e pamundur për gruan.
/Report.tv
