Pas thirrjes për të dëshmuar në Gjykatën e Hagës, kryeministri i Kosovës, Ramush Haradinaj ka dhënë dorëheqjen.
Në fund të mbledhjes së qeverisë kreu i qeverisë së Kosovës ka bërë të ditur se ka dhënë dorëheqje të parevokueshme.
Gjatë një deklarate për media, Haradinaj tha se ka pranuar një ftesë nga dhomat e specializuara të Gjykatës Speciale si i dyshuar dhe i është ofruar mundësia që të shkojë si i pari i qeverisë apo si qytetar i zakonshëm i Kosovës. Ai ka thënë se ka zgjedhur të dytën.
“Në Hagë do të shkoj si Ramush Haradinaj, t’i dalë përballë shpifësve ashtu si e kërkon nderi i një luftëtari të UÇK-së”, tha Haradinaj në mbledhjen e Qeverisë.
“Shteti im është Kosova e paprekshme, me multietnicitet, me shumë gjuhësi, me territor e kufi, Kosovës i bëhet presion i padrejtë për çmimin e njohjes nga Serbia, ndarja apo Dodik-Republika janë të papërballueshme për Kosovën”, tha Haradinaj.
“Do t’i qëndroj me besnikëri të gjithë, popullit, atdheut, dhe shtetit tim Kosovës, ju falënderoj për besimin e dhënë, ishte nder t’i shërbej vendit së bashku me ju. “, ishin fjalët e Haradinajt.
Ai do të paraqitet në dhomat e specializuara në Hagë ku do të intervistohet si i dyshuar.
