Ata marrin vëmendjen tonë çdo ditë, por më 1 Qershor të gjithë së bashku festojnë për ta! Një surprizë iu është rezervuar atyre jo vetëm nga prindërit sot, por edhe nga Policia e Shtetit.
Punonjësit e policisë kthyen vëmendjen nga fëmijët e pediatrisë dhe nxënësve në shkolla, për t’i bërë të lumtur ditën e tyre.
Të maskuar si personazhet e “Spiderman”-it dhe “Batman”-it kanë dhënë një shfaqje për fëmijët, teksa janë ngjitur me litarë në katet e sipërme të spitalit dhe të shkollës.
Ndërkohë për fëmijët e vegjël nuk kanë munguar as dhuratat, atyre iu ngjitën nga një stemë me shkrimin “Ti je heroi ynë”.
Krahas stemave, policët kanë luajtur me fëmijët duke i hipur edhe në motorët e tyre, ndërsa në “aksionin surprizë” ishte edhe ministri i Brendshëm Saimir Tahiri, i cili i përshëndeti nga afër.
