Nëse po ju ecën dita keq sot, më mirë mos u ankoni!
Një adoleshent nga Durrësi është kthyer në qendrën e vëmendjes pasi është gjetur i plagosur rëndë mes ferrave.
Ngjarja u denoncua fillimisht nga qytetari dixhital i Sali Berishës, por më pas policia ka dhënë versionin zyrtar të ngjarjes që na rezulton të jetë një “hangover” i vërtetë!
Pasi kishte pirë me shokët deri në orët e para të mëngjesit, i riu kishte hipur në çatinë e një kioske ku e kishte zënë gjumi dhe kishte rënë më pas në ferra duke u plagosur rëndë!
Gjendja e tij është stabilizuar pasi u dërgua në spitalin e Traumës! I riu nuk besohet të ketë konflikte, por kishte kaluar thjesht një natë jashtë me shokët duke pirë që rezultoi fatale për shëndetin e tij!
Njoftimi i policisë!
“Ngjarja ka ndodhur më 28 qershor në shkollën e Ishmit. Materialet në Prokurorinë e Krujës janë referuar që më 28 qershor. Ngjarja dyshohet për aksidentale. Janë marrë në pyetje shokët e të riut nga Komisariati i Fushë-Krujës dhe ata kanë thanë se kanë qenë një grup me djem, të cilët kanë pirë alkool deri në orët e para të mëngjesit. Më pas, janë shpërndarë në shtëpitë e tyre. Dyshohet që i riu ka hipur në çatinë e një kioske që gjendet pranë shkollës së Ishmit dhe të jetë rrëzuar kur e ka zënë gjumi. Ngjarja është dyshuar aksidentale sepse, nisur nga provat materiale në vendin e ngjarjes, këpucët e të riut janë gjetur në çatinë e kioskës, aty ku i kishte hequr para se ta zinte gjumi. Djali është nisur në Spitalin e Fushë-Krujës dhe më pas tek i Traumës. Hetimet vazhdojnë nga Prokuroria, e cila ka administruar të gjitha provat dhe dëshmitë e mbledhura. Nga dëshmitë që kanë dhënë shokët e tij bashkëmoshatarë nuk ka rezultuar që i riu të ketë pasur konflikte”, sqaroi Policia e Durrësit.
