Më sa duket, këtë të diel nuk do të ketë votime!
Kjo sipas Presidentit Ilir Meta, i cili njoftoi në një konferencë për median pas takimeve me krerët e partive dhe ambasadorët e vendeve të BE-së.
Meta caktoi datën e re te zgjedhjeve vendore që do të jetë 13 tetori.
Kreu i shtetit tha se nuk mund të detyrojë askënd të marrë pjesë në mënyrë të pavullnetshme në zgjedhje.
“Detyra ime si president dhe si i vetmi institucion që ka përgjegjësinë për datën e zgjedhjeve është tu jap mundësinë të gjithëve të reflektojnë. I bëj thirrje të gjithë forcave politike të sillen në mënyrë europiane”.
Presidenti zgjodhi datën 13 tetor për zgjedhjet për dy arsye:
“Është dita më e shpejtë për të organizuar zgjedhje të përgjithshme vendore gjithëpërfshirëse jo vetëm sa i takon vullnetit të atyre që dëshirojnë të marrin pjesë në zgjedhje por njëkohësisht edhe që dëshirojnë sipas të gjitha afateve ligjore dhe proceduriale të jenë të përfshirë në një administrim gjithëpërfshirës të procesit zgjedhor.
Arsyeja e dytë sepse e kam nënvizuar edhe në 8 qershor kur bëra publik vendimin dhe e kam ritheksuar dhe në 10 qershor në shpjegimet para jush, një nga arsyet kryesore ka të bëjë me garantimin e vazhdimësisë të integrimit europian, të mos shkëputjes së Shqipërisë nga Maqedonia Veriore lidhur me momentin e çeljes së negociatave. Për fat të keq kemi humbur mjaft kohë, por për fat të mirë ende në axhendën e BE është për të marrë një vendim për të dyja vendet në tetor dhe Këshilli i BE-së është në 17-18 tetor. Duke zgjedhur 13 tetorin si datën më të shpejtë për të garantuar zgjedhje gjithëpërfshirëse për të gjithë ata që duan të marrin pjesë dhe për të dhënë një mesazh pozitiv për një vendim pozitiv nga Këshilli i vendeve të BE”
