Taylor Swift publikoi sot videon e saj të re “You Need To Calm Down”.
Një video plot me personazhe të famshëm, që nga Ellen Degeneres, tek Ryan Reynolds, porse ajo që po tërheq më tepër vëmendjen është ish-rivalja e përbetuar e Taylor Swift-it, Katy Perry.
Kënga “ You Need to Calm Down” tingëllon si një tentativë e Taylor Swift-it për të patur një himn për tolerancën dhe mirëkuptimin.
Në këtë kuptim, ajo ka inskenuar një skenë pajtimi mes saj dhe Katy Perry-t, si qershia mbi tortë për mesazhin që po tenton të përcjellë.
Të dyja maskota, Katy si hamburger dhe Taylor si patate të skuqura, shikojnë njëra- tjetrën dhe afrohen, me atë qëndrimin që thotë: “Më fal, bëhemi prapë shoqe?”
Në fund, ato përqafohen.
Në fakt, kjo lëvizje nga ana e dy ish-rivaleve nuk vjen pa paraprirje.
Javën e kaluar, ato shpallën paqe në Instagram duke publikuar biskotat të cilat Taylor-i ia kishte dërguar Katy-t duke i shkruajtur:
“Më në fund paqe”.
Sherri mes tyre ka nisur shumë kohë më parë në 2014-ën, kur Taylor Swift akuzoi Katy Perry-n se i kishte marrë dy prej kërcimtarëve që i kishte të domosdoshëm për turin “Red Tour”.
