Në Shqipëri ende ekziston mentaliteti i prapambetur se raporti vjehrrë-nuse gjithnjë lë për të dëshiruar.
Ditën e sotme në programin “E Diela Shqiptare” një nuse kishte ftuar vjehrrën e saj për t’i kërkuar falje dhe për t’i thënë se e do shumë.
Nazmies i ishte dashur që të bëhej vjehërr vetë për të kuptuar se jo të gjitha vjehrrat janë njësoj.
Ajo për 20 vite me radhë kishte jetuar nën të njëjtën çati me vjehrrën, veçse në kate të ndryshme dhe nuk e respektonte atë sa ajo e respektonte Nazmien:
“Jam e martuar me tre fëmijë, dy djem të martuar me dy nuse të mrekullueshme që më kanë dhuruar një nip dhe një mbesë dhe vajzën. Një djalë e kam në shtëpi, ndërsa tjetrin e kam në Itali, nusja që jeton me mua më ka sjellë këtu sot. Atë që ka bërë ajo për mua unë s’ja kam bërë vjehrrës. Më dukej normale që i flisja vjehrrës kur doja, bëja çfarë doja, e takoja kur doja.”
Në vijim, Nazmia rrëfeu se vjehrra gjithnjë e thërriste atë bijë dhe i qëndronte pranë kur kishte nevojë:
“Nëse i kam sot borxh një njeriu, respekt dhe dashuri sot është vetëm vjehrra ime. Ajo ka pasur probleme shëndetësore, ka thyer këmbën, është bërë shumë e ndjeshme. Nuk e mendoja që e përjetonte kaq keq, i thoja ti je aktore. Zëri im dëgjohej deri poshtë. Në pozicionin që jam sot e kuptoj vjehrrën time.”
Pasi kjo e fundit erdhi në program, Nazmia mjaft e emocionuar i kërkoi falje për gjithçka dhe i tha publikisht për herë të parë “nënë”:
“Unë të kam dashur gjithmonë siç të kanë dashur të gjithë, por ndoshta nuk ta kam shprehur. Kam ardhur këtu për të kërkuar falje për çdo gjë që të kam shkaktuar në jetë ty. Do të kërkoj falje për ato lot që ke derdhur për mua, për puthjet që s’t’i kam kthyer kurrë. Ti asnjëherë nuk ke gabuar, je ndër ata pak persona që ke hyrë në zemrën time dhe s’ke dalë asnjëherë. Ti e di që mami dhe babi më kanë vdekur, po ta them këtu para publikut dhe pse nuk e kam bërë kurrë ti je nëna ime për mua.”
Xhemilja nga ana tjetër përzemërsisht i tha: “Edhe ti je goca ime!”
Le të shërbejë kjo histori si një shembull për të gjitha nuset dhe vjehrrat shqiptare… /tvklan.al
