Le ta pranojmë: vështirë të mos e hapësh atë lajmin që doli sot kudo nëpër internet se Duka dhe Dukesha e Sussex-it u bënë prindër për herë të parë.
Mbretërorët e Mbretërisë së Bashkuar na kanë hyrë deri në palcë dhe, i duam apo s’i duam, përfundojmë duke folur për ta si të jetë biseda më e natyrshme për filanin, djalin e filanes që e ke gocë tezeje.
Por, çfarë kanë Meghan Markle dhe Princi Harry që lindja e fëmijës së tyre të parë u shndërrua në një lajm më të madh se ç’mund të kishte qenë fjala vjen, sikur vetë kryeministria Theresa May, të ishte bërë nënë në moshën 63- vjeçare?
„Të famshmit në veçanti, marrin kaq shumë vëmendje sepse ata simbolizojnë gjithçka ne na është mësuar ta shtypim brenda vetes, si përshembull: ëndrra për të qenë i famshëm, i pasur dhe i lumtur. Kjo është përralla me të cilën rrisim fëmijët tanë“, shpjegon psikologu Frank Farley i Temple University në Shtetet e Bashkuara për revistën “Time”.
Por nga ana tjetër, ne jetojmë në një periudhë kur është shumë e lehtë të biesh në rrethin vicioz të medias. Që do të thotë: nëse njerëzit shfaqin interes për një personazh, media merret vetëm me të. Dhe kur njerëzit lexojnë çdo ditë për këtë personazh, fillojnë të bëhen akoma më të interesuar, madje edhe ata që nuk ishin në fillim.
“Jetojmë në një epokë ku çdo gjë ndikohet nga media”, thotë Farley, “Në njëfarë kuptimi, nuk ka shpëtim. Ka njerëz që fillojnë të interesohen edhe në detajet më të vogla.”
Por përse veçanërisht pjestarët e familjes mbretërore, na pëlqen kaq shumë të lexojmë për ta?
“Jeta është e vështirë, të jesh i suksesshëm është shumë e vështirë. Kurse, shikoji pak këta njerëz: pasurinë e kanë të trashëguar, kanë të trashëguar ndikimin në shoqëri, kanë të trashëguar stilin, famën, jetojnë në një jetë përrallore në kështjella- gjithçka ne ëndërrojmë kur jemi fëmijë!”, është shpjegimi i Farley-t.
Megjithatë, nuk ka ndonjë gjë të keqe të hutohesh me minuta të tëra duke lexuar gjithçka mbi Meghan Markle apo Kate Middleton, edhe nëse nuk je më fëmijë. Në fund të fundit, të gjithë kemi nevojë të na tregojnë përralla përpara gjumit dhe jeta e mbretërorëve, është thjesht një përrallë mediatike për të rritur.
Me pjesë nga shkrimi i “Time”: “Why are people obsessed with the royals, according to psychologists”
