Vitet ’98- ’99 qenë për shqiptarët e Kosovës, një traumë e pakapërcyeshme.
Të dëbuar me forcë nga shtëpitë e veta, në 1999-ën hynë në Kukës 187 refugjatët e parë nga Kosova, të cilët u mikpritën nga familjet kuksiane e më pas, një numër i madh prej rreth 13 mijë refugjatësh do të strehoheshin në shtëpitë e familjeve në të gjithë Shqipërinë.
Këtë, çifti Bytyçi nuk e harron kurrë. Ata u vendosën fillimisht në shtëpinë e familjes Axhami në Kukës e më pas, u shpërngulën në Tiranë ku qëndruan për dy muaj.
Sonte, Xhemal dhe Ajshe Bytyçi falenderuan publikisht në studion e “Dua të të bëj të lumtur”, familjen nga Tirana që i mikpriti në kohën më të errët.
“Publik i dashur”, u shpreh Xhemal Bytyçi, “Ky është Agim Hyseni, vëlla e shkuar vëllait. Ju falenderoj shumë për përkrahjen dhe pritjen që na keni bërë gjatë atyre dy muajve që kemi qëndruar bashkë!”
Të prekur, çifti që i mikpriti në shtëpinë e tyre kujtuan momentet e bashkëjetesës me familjen Bytyçi, pa e konsideruar aspak një borxh nga ana e tyre.
“Ne thjesht bëmë detyrën tonë, si shqiptarë.”
Çifti nga Kosova ndali për të dhënë një falenderim për të gjithë shqiptarët e Shqipërisë që pritën shqiptarët e Kosovës gjatë eksodit.
“Ju falenderoj gjithë ju shqiptarëve që na ndihmuat, që hapët dyert e shtëpive tuaja për ne.”
