Disa rrugë të kryeqytetit do të jenë të bllokuara gjatë ditës së nesërme. Bashkia e Tiranës ka njoftuar se do të organizojë më 5 maj “Ditën pa makina”, e cila ka për qëllim të ulë nivelin e ndotjes së ajrit.
Shefi i sektorit të kontrollit të territorit, në bashkinë e Tiranës, Toni Beni u bëri thirrje gjithë drejtuesve të automjeteve që nesër të lënë automjetet e tyre në shtëpi, teksa sqaroi edhe akset ku do të kufizohet qarkullimi.
“Ditën e dielë do të ketë një bllokim të bulevardit “Dëshmorët e Kombit”, duke filluar nga sheshi “Skënderbej” deri në sheshin “Nënë Tereza”. Nga ora 8:00 e mëngjesit, deri në orën 17:00, ky shesh do të jetë i bllokuar për lëvizjen e makinave. Gjithashtu, edhe rrugët ndërlidhëse, ose që ndërpresin bulevardin “Dëshmorët e Kombit” do të jenë të bllokuara. Policia Bashkiake, në bashkëpunim me Policinë e Shtetit, do të marrin masa edhe në lidhje me sigurinë e aktiviteteve”, deklaroi Toni Beni.
Ditën e nesërme janë menduar një sërë aktivitetesh për të gjitha moshat, pasi është 5 maji “Dita e Dëshmorëve” sakrificat e të cilëve sollën Tiranën e Shqipërinë në ditët e sotme!
