Ela ishte e ftuar në programin “Dua të të bëj të lumtur” nga nipi i saj, Joani. Kur Ela ishte studente ishte njohur me Sajmirin me të cilin kishte rënë në dashuri dhe u martua. Gjatë kohës që Ela ishte shtatzënë, mjekët i kishin thënë që fëmija mund të kishte probleme shëndetësore.
Pavarësisht kësaj, Ela dhe Sajmiri kishin vendosur që të mos e abortonin djalin. Mirëpo me rritjen e djalit, problemet e para shëndetësore kishin filluar të shfaqeshin. Sfidat për prindërit nuk kishin të mbaruar pasi disa vite më vonë Sajmiri ishte diagnostikuar me një sëmundje të pashërueshme. Për fat të keq ai ndërroi jetë dhe Ela vazhdoi e vetme kalvarin e rritjes së fëmijës.
“ Si fillim dua të të kërkoj falje që u largova për në Gjermani, por dua të të falenderoj që më ke mësuar se çfarë do të thotë të përballesh me vështirësitë në jetë. Të lutem që të jesh gjithmonë e fortë siç ke qenë dhe të mos dorëzohesh asnjëherë!”, u shpreh Joani ndaj tezes.
Ela u shpreh mirënjohëse ndaj nipit dhe familjes së motrës sepse pa ndihmën e tyre nuk do t’ia kishte dalë mbanë!
