Është zyrtare: Angelina Jolie dhe Brad Pitt janë beqarë! Pas disa vitesh procedura për divorcin, dy aktorët rivendosën ligjërisht statusin e tyre si beqar në gjendjen civile.
Çifti u nda mbi dy vite më parë dhe nënshkruan një dokument që i deklaron zyrtarisht beqarë, ditën e premte.
Në këtë mënyrë Angelina hoqi ligjërisht mbiemrin Pitt, ndërsa media “Blast” ka siguruar një pjesë të dokumentit.
“Pavarësisht se ata nuk bien dakord për gjithçka, rrallë debatojnë. Brad dhe Angelina janë në një pikë tani që mund të diskutojmë me qetësi për fëmijët e tyre. Janë të dy shumë të dedikuar për t’i edukuar dhe për t’i rritur së bashku fëmijët. Tani fëmijët kalojnë kohë me të dy prindërit dhe janë të lumtur”, tha një burim.
43-vjeçarja Jolie dhe 55-vjeçari Pitt duhet të vazhdojnë negociatat për kushtet e tjera të divorcit, përfshirë ndarjen e pasurisë dhe kujdestarinë për gjashtë fëmijët e tyre.
Për këtë të fundit u raportua se u arrit një marrëveshje në nëntor të 2018-s. Ndarja e dyshes në vitin 2016 vazhdon të jetë ndër më të përfolurat.
Burimi: Fox News
