Dy ditë pas grabitjes së 10 milionë eurove në Rinas, aeroporti është blinduar nga ushtarakë që patrullojnë cep më cep.
Ministrja e Mbrojtjes Olta Xhaçka ishte sot në Rinas për të parë situatën, dhe patrullimin e ushtarakëve përreth aeroportit, ku secili prej tyre përshkon 1.2 km.
Pavarësisht se dukej sikur ishte shpallur gjendje e jashtëzakonshme, ministrja tha se nuk jemi në gjendje lufte, por në një situatë ku na është cenuar siguria:
“Nuk kemi luftë, nuk kemi situatë të cenimit të sigurisë kombëtare ku do të duhet të kishim marrë një miratim të Parlamentit dhe jo të presidentit. Pothuajse gjysma e pistës është infrastrukturë ushtarake, pra i takon Komandës së Forcës Ajrore dhe gjysma tjetër është për përdorim civil. Aeroporti “Nënë Tereza” është infrastrukturë kritike edhe e NATO-s po ashtu, sepse këtu ulen edhe avionë ushtarakë. Njëkohësisht kemi prezencë ushtarake edhe në Autoritetin e Aviacionit Civil, kemi edhe një njësi “Host-nation support” që është një njësi që lehtëson të gjithë lëvizjet e cargo-ve ushtarake apo avionëve ushtarakë apo personaliteteve të NATO-s, të cilët për arsye të ndryshme vizitojnë dhe vijnë në vendin tonë. Kështu që kjo është një infrastrukturë ushtarake pjesërisht dhe cenimi i të gjithës patjetër na cenon edhe ne”, tha sot nga Rinasi ministrja Xhaçka.
Një person mbeti i vdekur gjatë shkëmbimit të zjarrit me policinë ditën e martë, ndërsa tre bashkëpunëtorët e tij janë ende në kërkim.
