U dha sot vendimi për katër autorët e vrasjes së 22-vjeçarit Marvi Mihali nga Gjykata e Krimeve të Rënda.
Për ngjarjen e ndodhur në verën e 2017-s, gjykata vendosi të dënojë me 12 vite burg Eugen Bitrajn, vëllezërit Kridens dhe Marsel Allajn (në mungesë) dhe me 19 vite burg autorin kryesor Dejvis Bitrajn.
Pas dhënies së vendimit u prononcuan të trishtuar prindërit e viktimës.
Nëna e Marvi Mihali tha me lot në sy: “Këta gjykatës hoqën paramendimin nga vepra penale dhe lanë vetëm vrasje në bashkëpunim me dashje dhe nuk u bëhet vonë për djalin tim që vdiq. Fatin tim të zi e provofshin gjykatësit në fillim”.
Ndërsa babai i të ndjerit, Pavllo Mihali, u shpreh: “Çfarë është kjo drejtësi?! Padrejtësia e gjykatësve sot lëvizi pllakën e djalit tim, por ne do ta ndjekim me çdo kusht, unë do ta vendos drejtësinë me të gjitha mënyrat. 19 vite Devi Bitraj që më vrau çunin?! Turp e faqe e zezë”.
Marvi, djali i vetëm i familjes Mihali, humbi jetën pas një sherri të dhunshëm që nisi për arsye banale, pranë stadiumit “Dinamo”.
Si ndodhi sherri:
Sherri nisi në lokal mes 19-vjeçarit Dejvis Bitraj dhe 22-vjeçarit Marvi Mihali për një karikues telefoni. Marvi kishte blerë një telefon te Dejvi dhe po i kërkonte edhe karikuesin.
Ky i fundit e tërhoqi jashtë Marvin në parkingun e makinave të lokalit dhe pasi janë rrahur ka thirrur në ndihmë kushëririn dhe shokët e tij. Në ndihmë të Dejvit kanë shkuar Eugen Bitraj, Kridens Allaj, 19 vjeç dhe Marsel Allaj, 23 vjeç.
Gjatë konfliktit Bitraj nxori thikën dhe goditi Marvi Mihalin, i cili gjeti vdekjen në spital. Bitraj pretendon se e ka kryer vrasjen, pasi Mihali e kishte fyer.
