Është publikuar sot fotoja e parë e të shumëkërkuarit për vrasjen e Jurgen Kurtit.
Personi në foto është Klodian Bane (Buxhaku), 37 vjeç, i shpallur në kërkim si i dyshuari kryesor për vrasjen e 26-vjecarit Kurti, pak ditë më parë në rrugën “Zef Jubani” në Tiranë.
Policia zotëron prova të forta për implikimin e Klodian Banes në krim nga pamjet e kamerave të sigurisë ku janë pikasur edhe tre të arrestuarit, Olsi Qalliaj, Elsi Levendi dhe Alesio Berberi, si bashkëpunëtorë në atenatin ndaj Kurtit.
Ekzekutimi i Kurtit është filmuar. Kamerat e sigurisë të vendosura në vendin ku u ekzekutua Jurgen Kurti, kanë zbardhur me detaje të gjithë veprimtarinë e tre të arrestuarve Olsi Qalliaj, Elsi Levendi dhe Alesio Berberi si dhe të të shumëkërkuarit Klodian Bane (Buxhaku).
“BalkanWeb” shkruan se pas ekzekutimit të 26-vjecarit, hetuesit u vunë në ndjekje të një makine tip “Mercedez Benz”, E Clas, ngjyrë gri, e cila u përdor nga autorët për t’u larguar nga vendngjarja.
