Çdo shqiptar ndihet mjaft i kënaqur dhe krenar kur mëson se një person nga Shqipëria shkëlqen në karrierën e tij në një vend të huaj, duke përfaqësuar kështu jo vetëm veten, por edhe gjithë Shqipërinë.
E teksa personazhet publikë shqiptarë që kanë shtrirë tentakulat përtej vendit janë të shumtë në numër, fatmirësisht atyre po iu bashkohen çdo ditë e më shumë figura të reja.
Po flasim për vajzën e koreografit të njohur Ilir Shaqiri, Emily Shaqiri.
Rikujtojmë se babai i kësaj të fundit, përmes angazhimeve të tij në Itali arriti të bëhej një nga figurat më të dashura për publikun.
Dhe duket se talentin e tij e ka trashëguar edhe e bija, Emily. Ajo aktualisht është protagoniste në grupin artistik “Miracle Tunes”, seritë e të cilit shfaqen edhe në Mediaset. Ajo ka mahnitur një Itali të tërë me talentin e saj.
Specifikisht, roli i Emily është ai i një luftëtareje që synon të shpëtojë botën nga e keqja përmes kërcimit, këngës dhe muzikës. Dhe për ta realizuar misionin e tyre, Emily bashkë me dy pjesëtaret e tjera të grupit përdorin fuqinë e gurëve të çmuar të muzikës.
