Skandali i abuzimit seksual ndaj nxënëses 16-vjeçare në Drenas thellohet akoma më shumë, pasi i përfshirë në këtë ngjarje është edhe avokati Gazmend Halilaj.
Ky i fundit u arrestua dhe Gjykata e Prishtinës ka caktuar 30 ditë paraburgim për të. Sipas të dhënave të publikuara nga “Kallxo.com”, Halilaj është arrestuar këtë javë nën dyshimet për keqpërdorim të detyrës dhe abuzim seksual të vajzës së mitur nga Drenasi.
Në dosjen e Prokurorisë thuhet se, Halilaj si avokat i profesorit të akuzuar, ka shfrytëzuar rastin dhe ka krijuar afërsi me vajzën e mitur nga Drenasi.
“Ekziston dyshimi i bazuar se si avokat i të dyshuarit ka përfituar nga ky rast dhe sipas tij që nga fundi i vitit 2017 është njohur nga afër me vajzën dhe ka filluar të shoqërohet me të dhe të hyjë në lidhje, raporte dashurie”, thuhet në kërkesën e Prokurorisë për caktimin e paraburgimit ndaj avokatit.
Sipas dosjes, ai e ka shfrytëzuar seksualisht dhe e ka manipuluar të miturën duke e shtyrë që t’i denoncojë personat e tjerë për abuzim seksual.
