Taylor Swift duket se ende nuk ka mundur ta kapërcejë betejën e dikurshme virtuale me Kim Kardashian, pasi e quajti gjarpër.
Për ata që nuk e kanë të qartë atë çka ka ndodhur mes tyre, rikujtojmë se Kim e quajti atë gjarpër pas një sherri që Taylor pati me Kanye West.
Ky i fundit pretendoi që për këngën “Famous”, ku thoshte se ishte ai që e kishte bërë Swift të famshme, i kishte marrë leje vetë këngëtares për vargjet.
Për këtë ai publikoi dhe një regjistrim ku dëgjohej biseda mes tyre dhe miratimi nga ana e Taylor.
Por kjo nuk e ndaloi artisten që në ceremoninë e çmimeve Grammy në vitin 2016 të thoshte tërthorazi se Kanye po mundohej të merrte meritat për atë që ajo kishte arritur.
Fakti që Kim e quajti Taylor-in gjarpër në vitin 2016 bëri që i gjithë interneti t’i bashkohej, duke shkaktuar bullizëm tek Taylor.
Mirëpo pavarësisht se tashmë kanë kaluar vite, ylli i muzikës vijon që në intervistat e saj ta përmendë bullizmin që përjetoi asokohe.
Së fundmi, përgjatë një interviste për “Elle”, ajo ka ndarë me publikun 30 gjëra të cilat i ka mësuar përpara se të mbushte 30 vjeç.
Një ndër to ishte: “Të jesh e mirë me çdokënd gjatë gjithë kohës mund të të shkaktojë shumë probleme.”
Gjithashtu gjatë intervistës së saj, në mënyrë indirekte përfshiu edhe Kim Kardashian dhe bashkëshortin e saj Kanye West: “Disa vite më parë dikush nisi një fushatë urrejtjeje virtuale ndaj meje duke më quajtur gjarpër. Fakti që shumë persona iu bashkuan, më bëri që të ndihesha më e ulët se asnjëherë në jetën time. Por nuk mund t’ju tregoj ju sa të vështirë e kisha të mbaja të qeshurën sa herë që kobra 20 metra me emrin Karyn shfaqej në skenë përpara 60.000 fansave duke ulëritur.”
Kësisoj, ajo nuk përmendi emra, mirëpo qartazi dukej se fjalët e mësipërme i atribuoheshin çiftit Kanye-Kim, pasi edhe epiteti me të cilin cilësoi kobrën ishte “Karyn.”
E gjitha kjo “performancë” e Taylor duke ironizuar publikisht Kanye-Kim për atë që i shkaktuan vite më parë, mund të përkthehet edhe si një lloj hakmarrje virtuale!
