Bashkëshortja e policit në Gruemirë të Malësisë së Madhe ka rrëfyer sot për momentin kur mësoi lajmin mbi akuzat e ngacmimeve seksuale ndaj një 15-vjeçareje.
Berhan Bajrakurti u arrestua pas video skandalit që u publikua në media, por u lirua pak javë më pas pasi askush nuk kishte bërë një denoncim zyrtar në polici.
Në një lidhke telefonike për emisionin “Me zemër të hapur” në News24, bashkëshortja e policit tha se nuk e ka besuar në asnjë moment se bashkëshorti i saj mund të bëjë një gjë të tillë.
“Unë dëgjova dhe e mora në telefon, më tha e kanë ndaluar për një problem, por do e zgjidhi. Nuk e besova për asnjë moment atë gjë që doli në fillim”, ka thënë ajo.
Ajo tha se në asnjë moment nuk i mori për të vërteta akuzat por për shpifje:
“Me qëllim e kanë bërë për të shkatërruar familjen. Ngjarja ishte shumë e pështirë. Të gjithë kanë thënë se janë shpifje”.
Sa i përket gjendjes së bashkëshortit, ajo u shpreh se atij i vjen inat për farë ka ndodhur.
“Ne i japim mbështetje. Reagimin më të fortë e patën vajzat. Të gjithë jemi ndjerë keq. Bashkëshortit i jap kurajo dhe të përballet me drejtësinë. Të tjerëve u kam lënë Zotin”.
/BalkanWeb
