Shashka, tymuese, kapsolla dhe djegie gomash para Kuvendit.
Opozita ka vendosur që të protestojë ditën e sotme për të tretën herë, në muajin shkurt. Ajo kërkon me ngulm dorëheqjen e kryeministrit Edi Rama.
Kjo e sotmja megjithëse është një protestë e paparalajmëruar, Policia e Tiranës ka marrë gjithë masat për mbarëvajtjen e saj dhe sigurinë e institucionit të parlamentit.
Pak më herët, teksa hynin në Kuvend u sulmuan nga protestuesit ministri i Turizmit Blendi Klosi dhe deputetët Paulin Sterkaj dhe Sadri Abazi.
Ndërsa aktualisht raportohet se situata është mjaft e tensionuar tek parlamenti, ku pas shtyrjeve dhe tentativave nga protestuesit për të çarë radhët e policisë, është hedhur gazi lotsjellës.
Policët e rendit janë larguar dhe FNSH është gati për ndërhyrje. Gazi lotsjellës i hedhur nga Policia ka arritur të shpërndajë turmën e protestuesve, një pjesë e të cilëve janë tërhequr drejt rrugës së Elbasanit.
Gazit lotsjellës nuk i kanë shpëtuar as liderët politikë të opozitës. Kryetarja e LSI-së, Monika Kryemadhi i është larguar në kohë një kapsolljeje me gaz lotsjellës.
Kryemadhi është kapur menjëherë nga shoqëruesit e saj për krahu, të cilët e kanë larguar me shpejtësi.
Pas gazit lotsjellës janë bërë gati botet e ujit për të larguar protestuesit.
Ndërkohë, qytetarë të shumtë e mbështetës të opozitës janë vendosur në dy hyrjet e parlamentit, ku kanë kaluar deputetët e maxhorancës. Ata kanë lëshuar thirrje “Parlament i krimit”, “Rama ik”, “Liri demokraci”, “Këtu vendosim ne”.
Mes protestuesve janë edhe kreu i PD-së Lulzim Basha, ish-kryeministri Sali Berisha si dhe përfaqësues të tjerë politikë të opozitës. Ndërsa brenda parlamentit vijon seanca plenare.
Rikujtojmë se të gjithë deputetët e opozitës janë dorëhequr nga mandati i tyre në shenjë proteste kundër maxhorancës.
